اسلام آباد (مانیٹرنگ، این این آئی)فرح خان گوگی کی بنی گالہ میں ایک اور قیمتی جائیداد نکل آئی، ڈیڑھ سال میں صرف بنی گالہ میں تین ارب کی مالیت کے اثاثے بنائے،سماء نیوز نے اپنی رپورٹ میں کہا ہے کہ فرح خان کی بنی گالہ میں ایک اور قیمتی جائیداد نکل آئی ہے، جائیداد کی مالیت پچاس کروڑ سے زائد ہے،نجی ٹی وی کے پاس موجو د دستاویزات کے مطابق فرح خان نے چالیس کنال زمین اگست 2021ء میں خریدی،
جائیداد علی ملک سے تین کروڑ بیس لاکھ میں خریدی گئی، فرح خان نے دو سال میں بنی گالہ میں مجموعی 240 کنال زمین خریدی، اکتالیس کروڑ ادا کیے گئے ہیں، مارکیٹ ویلیو اس زمین کی تقریبا ً تین ارب روپے بنتی ہے، واضح رہے کہ قومی احتساب بیورو(نیب) نے عمران خان کی اہلیہ بشریٰ بی بی کی دوست فرح خان عرف فرح گوگی سے متعلق انکوائری کا آغاز کردیا۔نیب کی جانب سے جاری اعلامیے کے مطابق انکوائری نامعلوم ذرائع آمدن اور منی لانڈرنگ کے الزامات پر کی جائیگی، ڈی جی نیب لاہور کو قانون کے مطابق کارروائی کا حکم دے دیا گیا ہے۔ اعلامیے کے مطابق فرح خان پر مختلف کاروبار کے نام پر بہت سے بینک اکاؤنٹس رکھنے کا الزام بھی ہے، فرح خان کے اکاؤنٹ میں گزشتہ 3 سال میں 847 ملین روپے ملے ہیں۔ نیب کے مطابق اتنی رقم فرح خان کے پروفائل کے مطابق نہیں ہے، یہ رقوم فرح خان کے ذاتی اکاؤنٹ میں ڈالی گئیں اور فوری نکال لی گئیں، میڈیا رپورٹس میں فرح خان پر غیر قانونی ذرائع سے اثاثے بنانے کے الزامات لگائے گئے تھے۔نیب اعلامیے میں کہا گیا کہ فرح خان کے انکم ٹیکس ریٹرنز میں ان کے اثاثے 2018 سے غیر معمولی طور پر بڑھے، اسی دوران فرح خان 9 بار امریکا اور 6 بار یو اے ای بھی گئیں۔خیال رہے کہ سال 2018 میں ہی عمران خان اقتدار میں آئے تھے اور اسی سال عثمان بزدار وزیراعلیٰ پنجاب کے منصب پر فائز ہوئے تھے،
ذرائع کے مطابق عثمان بزدار کی تعیناتی میں فرح خان کا اہم کردار تھا۔خیال رہے کہ سابق خاتون اول بشریٰ بی بی کی دوست فرح خان رواں ماہ کے آغاز میں دبئی روانہ ہوگئی تھیں۔(ن لیگ اور پیپلز پارٹی کے رہنماؤں نے فرح خان پر ٹرانسفر، پوسٹنگ اور دیگر معاملات میں پیسے لینے کا الزام لگایا ہے۔
