اسلام آباد (این این آئی)سابق وزیر اعظم عمران خان کی سابق اہلیہ ریحام خان کی پارلیمنٹ ہائوس میں بنائی گئی ویڈیو وائرل ہونے کے بعد متعدد شوبز شخصیات نے ان پر تنقید کرتے ہوئے بد بخت اور بے رحم سابق شریک حیات قرار دیا ہے۔ریحام خان اور عمران خان نے 2014 کے اختتام میں شادی کی تھی اور ان کے درمیان اکتوبر 2015 میں طلاق ہوگئی تھی۔طلاق ہوجانے کے بعد

عمران خان کے حوالے سے بات کرنے پر پہلے بھی ریحام خان کو تنقید کا نشانہ بنایا گیا اور 9 اپریل کو جب قومی اسمبلی میں وزیر اعظم کے خلاف تحریک عدم اعتماد پر ووٹنگ ہوئی تو اس وقت ریحام خان نے اسمبلی ہال سے ایک ویڈیو شیئر کی تھی جس پر انہیں شوبز شخصیات نے بھی تنقید کا نشانہ بنایا۔ریحام خان نے قومی اسمبلی کے ہال سے بنائی گئی مختصر ویڈیو کے آخر میں کدھر ہو نیازی، ڈر گئے کیا؟ کا جملہ بولا تھا، جس پرعمران خان کی مداح شوبز شخصیات کو برا لگا اور انہوں نے ریحام خان پر تنقید کی۔ریحام خان نے مذکورہ ویڈیو ٹوئٹ کی تھی، جسے بعد ازاں دیگر سوشل میڈیا پیجز پر بھی شیئر کیا گیا اور لوگوں نے ان کی ویڈیو پر طرح طرح کے تبصرے کیے۔ریحام خان کی ویڈیو سوشل میڈیا پر ویڈیو شیئر ہونے کے بعد متعدد شوبز شخصیات نے ان کے خلاف کمنٹس کرتے ہوئے ان کے لیے بد بخت سابق بیوی اور زہر، سانپ، بے رحم، سابق شوہر کی عزت نہ کرنے والی سمیت دیگر الفاظ لکھے۔ریحام خان کی ویڈیو پر ایمن خان، منیب بٹ، فیروز خان، نادیہ حسین اور عدیل چوہدری سمیت دیگر شخصیات نے کمنٹس کیے۔ریحام خان کی وائرل ویڈیو پر عام لوگوں نے بھی کمنٹس کیے، جہاں لوگوں نے ان کے خلاف نامناسب زبان کا استعمال کیا، وہیں بعض افراد نے ان کی تعریفیں بھی کیں۔اس سے قبل ریحام خان نے عمران خان کی حمایت کرنے والی شوبز شخصیات پر تنقید کی تھی اور کہا تھا کہ اداکاروں کو ان کے آرٹ کی وجہ سے عزت ملتی ہے، انہیں ایک فاشسٹ حکومت کی حمایت نہیں کرنی چاہیے۔