اسلام آباد (این این آئی) پاکستان مسلم لیگ ن کو بھی وفاقی دارالحکومت اسلام آباد میں جلسے کی اجازت مل گئی ہے۔ضلعی انتظامیہ نے ن لیگ کو 28 مارچ کو جلسہ کرنے کے لیے این او سی جاری کر دیا ،ضلعی انتظامیہ کی جانب سے دیے گئے این او سی کے مطابق ن لیگ کو صرف ایک دن کیلئے جلسے کی اجازت دی گئی ، اجازت نامہ ایک دن کے جلسہ کیلئے دیا گیا ، جلسے کے شرکا ریڈ زون نہیں جائیں گے۔

کسی کو ریذ زون کی طرف جانے کی اجازت نہیں دی جائے گی۔ن لیگ کو جاری این او سی میں کہا گیا کہ جلسے کے دوران سری نگر ہائی وے سمیت کوئی سڑک بند نہیں کی جائیگی، جلسے کے منتظمین این او سی کی شرائط پر عملدرآمد یقینی بنائیں گے۔یاد رہے کہ پاکستان تحریک انصاف آج اسلام آباد کے پریڈ گراؤنڈ میں جلسہ کر رہی ہے ،جے یو آئی ف کے سربراہ مولانا فضل الرحمان نے بھی کہا ہے کہ جب سارے کارکن اسلام آباد پہنچ جائیں گے تو پھر ان سے خطاب کیا جائے گا۔دوسری جانب انتظامیہ نے این او سی کی شرائط کے خلاف جانے پر جمعیت علمائے اسلام ( ف) کو دوسرا شوکاز نوٹس جاری کر دیا۔ڈپٹی کمشنر اسلام آباد حمزہ شفقات کی جانب سے یہ جے یو اًئی (ف )کو نوٹس جاری کیا گیا ،شوکاز نوٹس میں کہا گیا کہ این او سی کی شرائط میں سری نگر ہائی وے کو بند نہ کرنا شامل تھا، تاہم جے یو آئی ف کے کارکنوں نے سڑک کو بند کیا ہوا ہے۔ڈپٹی کمشنر اسلام آباد کا شوکاز نوٹس میں کہنا ہے کہ این او سی کے ساتھ اسلام آباد ہائی کورٹ کے بھی واضح احکامات موجود ہیں۔جے یو آئی ف کو جاری کیے گئے دوسرے شوکاز نوٹس میں کہا گیا کہ 24 گھنٹوں کے اندر جواب نہ دینے پر مقدمہ درج ہو سکتا ہے۔