لاہور( این این آئی) وزیر اعلیٰ پنجاب سردار عثمان بزدار نے سابق وزیراعلیٰ کو ملنے والی حکومتی مراعات کی تفصیلات مانگ لیں جبکہ محکمہ آئی اینڈ سی نے سابق وزیر اعلیٰ کو حکومت کی جانب سے دی جانے والی مراعات کی سمری ارسال کر دی ہے
جس میںسابق وزیر اعلیٰ کیلئے مراعات میں اضافے کی سفارش کی گئی ہے ۔نجی ٹی وی کے مطابق وزیر اعلیٰ عثمان بزدار نے سابق وزیر اعلیٰ کو ملنے والی مراعات کے حوالے سے تفصیلات طلب کیں۔ نجی ٹی وی کے مطابق قانون میں ترامیم کر کے سابق وزیر اعلیٰ کی سکیورٹی اور پروٹوکول بڑھانے کی سفارشات پیش کی گئی ہیں۔ سابق وزیر اعلیٰ کی سکیورٹی کیلئے دو ایلیٹ پولیس کی گاڑیاں دی جائیں گی،سمری میں وزیر اعلیٰ پنجاب کیلئے ذاتی ملازمین کی تعداد پانچ سے زیادہ کرنے کی سفارش بھی کی گئی ہے،سابق وزیر اعلیٰ کو کسی بھی سرکاری ریسٹ ہائوس میں قیام کی اجازت ہو گی۔وزیر اعلیٰ کی جانب سے مراعات کی تفصیلات طلب کرنے کی میڈیا رپورٹ کے بعد سیاسی حلقوں میں چہ مگوئیاں شروع ہو گئی ہیں اور یہ سوال اٹھایا جارہا ہے کہ کیا وزیر اعلیٰ سردار عثمان بزدار جانے کے لئے تیار ہوگئے ہیں۔
