کولمبو(این این آئی)سری لنکا میں 14روز میں ڈالر کے مقابلے میں سری لنکن روپے کی قدر میں انتہائی کمی دیکھنے کو ملی ہے۔میڈیارپورٹس کے مطابق سری لنکا میں ایک ڈالر 280 سری لنکن روپیسے زیادہ کا ہوگیا، سری لنکن حکومت کے پاس ایندھن اور ادویات کی
درآمدات کیلئے ڈالرز نہیں ہیں۔سری لنکا میں پیپر درآمد نہ کر سکنے کے سبب امتحانات بھی منسوخ ہو چکے ہیں۔دوسری جانب عالمی منڈی میں خام تیل کی قیمت میں اضافہ منگل کے روز بھی جاری رہا۔ یوکرین میں روس کی جنگ اور سعودی عرب میں تیل کی تنصیب پر حوثیوں کے حملے کے سبب عالمی منڈی میں تیل کی ترسیل کے حوالے سے اندیشوں نے جنم لیا ہے۔میڈیارپورٹس کے مطابق برینٹ خام تیل کے مستقبل کے سودوں کی قیمت 2.23% اضافے کے ساتھ فی بیرل 118.18 ڈالر تک پہنچ گئی۔ امریکی خام تیل کی قیمت بھی 2.13% اضافے کے ساتھ فی بیرل 112.31 ڈالر پر پہنچ گئی۔یورپی یونین میں شامل ملکوں کی حکومتیں رواں ہفتے امریکی صدر جو بائیڈن کے ساتھ ایک اجلاس میں اکٹھا ہوں گی۔ یورپی حکومتیں اس امر پر غور کریں گی کہ آیا یوکرین پر حملے کے سبب روس پر تیل کی پابندی عائد کی جائے یا نہیں،یورپی یونین پہلے ہی روس کے خلاف متعدد اقدامات عمل میں لا چکے ہیں۔ ان میں روسی مرکزی بینک کے اثاثے منجمد کرنا شامل ہے۔
