اسلام آباد (این این آئی)اپوزیشن لیڈر شہباز شریف نے مولانا فضل الرحمان کے ہمراہ آصف زرداری سے ملاقات کی جس میں ملکی سیاسی صورت حال اور عدم اعتماد کی تحریک کے حوالے سے اہم امورپربات چیت کی گئی ۔ ذرائع کے مطابق ملاقات میں یوسف رضا گیلانی،
وزیراعلیٰ سندھ مراد علی شاہ، شاہد خاقان عباسی، سید خورشید شاہ، سید نوید قمر، احسن اقبال، رانا ثنائ اللّٰہ خان، خواجہ آصف، سردار ایاز صادق، خواجہ سعد رفیق، مرتضیٰ وہاب اور مریم اورنگزیب بھی موجود تھے۔ذرائع کے مطابق اپوزیشن کے تین بڑوں نے عمران خان کے خلاف عدم اعتماد کی تحریک لانے کی تاریخ آپس میں طے کرلی ہے، جس کا اعلان جلدکیا جائیگا۔ن لیگ کے رہنما رانا ثناء اللہ نے زرداری ہاؤس کے باہر میڈیا سے گفتگو کرتے ہوئے کہا کہ 100 فیصد اعتماد ہے کہ تحریک عدم اعتماد کامیاب ہوگی، ہم اس مصیبت سے جلد نجات حاصل کرلیں گے، جو فیصلہ ہوا اس سے قائدین آگاہ کریں گے۔ جے یو آئی کے رہنما اکرم درانی نے کہاکہ سب تسلی رکھیں ایک دو دن تک سب پتہ چل جائیگا۔
