لاہور( این این آئی)مسلم لیگ (ن) پنجاب کے صدر رانا ثنااللہ نے وزیراعظم اور وفاقی وزرا ء کو چیلنج دیتے ہوئے کہا ہے کہ عمران نیازی کا اپنے ممبران پر خریدے جانے کا الزام لگانا ممبران کی تضحیک ہے ،اگر آپ کے پاس بندے پورے ہیں تو اسمبلی کا اجلاس بلائیںاپنے ارکان پر الزام نہ لگائیں ۔
اپنے بیان میں انہوں نے کہا کہ جو عوام کو کنگال کرنے پر آپ کو چھوڑ کر جا رہے ہیں دیگر ارکان کو چھوڑیں تو پرویز خٹک پہلے اپنے بھائی کو تو پی ٹی آئی میں واپس لے آئیں ،چپڑاسی، گلے کی کمائی کھانے اور جہانگیر ترین کے خرچے پر الیکشن لڑنے والے عمران نیازی کے سگے بننے کی کوشش کر رہے ہیں ،بندے پورے ہیں تو اسمبلی کی کرسیاں کیوں اکھاڑدیں، قالین کیوں اکھاڑ دئیے؟اپنے وزراء پر خریداریوں کے الزامات لگارہے ہیں، حکومت نے ہارس ٹریڈنگ کا اعتراف کرلیا ہے ۔ انہوں نے کہا کہ عمران نیازی بلاتاخیر اجلاس بلائیںاوراپنے دعوئوں کو سچ کردکھائے ،بڑھکیں مارنے اور روزانہ ہلکان ہونے کی بجائے اسمبلی اجلاس بلائیں دودھ کا دودھ اور پانی کا پانی ہوجائے گا ۔ انہوںنے کہا کہ عمران نیازی دیر نہ لگائیں فوری اجلاس بلائیں اور تحریک عدم اعتماد کا ناکام بنادیں ،عمران نیازی اور وزرا ء کی بوکھلاہٹ ان کے بیانات سے عیاں ہے ،ارکان پورے ہیں تو اپوزیشن ارکان کی خریداری کی ضرورت کیوں پڑی؟جن کو کچے گھر اور غریب نظر نہیں آتے انہیں اب حقیقت نظر آنا بند ہوچکی ہے ،یہ ساون کے اندھے ہیں انہیں ہر طرف ہرا ہرا ہی نظر آئے گا، عمران نیاز ی اور وزرا ء کی آنکھیں جلد کھل جائیں گی اور انہیں جلد حقیقت کا پتہ چل جائے گا۔
