لیہ (این این آئی)لیہ میں ایم ایم روڈ گولہ اڈا کے قریب دوگاڑیوں کے خوفناک حادثے میں 7 افراد جاں بحق اور 10 سے زائد زخمی ہوگئے جن میں بعض کی حالت نازک ہے جس کے باعث ہلاکتوں میں اضافے کاخدشہ ہے ۔ریسکیو ذرائع کے مطابق لیہ کی تحصیل چوک اعظم میں گولہ اڈا کے قریب 2 گاڑیاں ٹکرا گئیں، جس کے نتیجے میں 5 افراد موقع پر ہی جاں بحق اور پندرہ سے زائد زخمی ہوئے
، جاں بحق ہونے والوں میں 3 بچے اور خاتون بھی شامل ہیں۔ذرائع کے مطابق حادثہ اتنا شدید تھا کہ دونوں گاڑیاں مکمل طور پر تباہ ہوگئیں ، جائے حادثے پر قیامت صغریٰ کا منظر رہا، شدید زخمی امداد بْری طریقے سے گاڑیوں میں پھنس گئے اور مدد کو پکارتے رہے۔واقعہ کی اطلاع ملنے پر امدادی ٹیمیں جائے حادثے پر پہنچی اور لاشوں وزخمیوں کو گاڑیاں کاٹ کر ٹی ایچ کیو ہسپتال منتقل کیا گیا۔ریسکیو ذرائع کے مطابق حادثے کا شکار مزید دو زخمی دوران علاج ہسپتال میں دم توڑ گئے جس کے بعد ٹریفک حادثے میں جاں بحق افراد کی تعداد 7 تک جاپہنچی۔ادھر ہسپتال ذرائع کا کہنا ہے کہ گولہ اڈا ٹریفک حادثے کے بیشتر زخمیوں کی حالت تشویشناک ہے، جس کے باعث اموات میں اضافہ کا خدشہ ہے، ہسپتال میں ایمرجنسی نافذ ہے اور مقامی افراد سے خون کے عطیات کی اپیل کی گئیں ۔
