تھائی لینڈ، سڈنی ، راولپنڈی (مانیٹرنگ ڈیسک ، این این آئی)تھائی لینڈ کی پولیس نے کرکٹر شین وارن کی صدمے سے موت کے معاملے میں کسی قسم کے بیرونی عنصر کو مسترد کر دیا ، تھائی پولیس کے مطابق ان کی لاش کو مقامی وقت کے مطابق شام 6 بجے (1100 GMT) تھائی انٹرنیشنل ہسپتال ساموئی لایا گیا۔
تھائی پولیس نے اے ایف پی کو بتایا کہ ہماری تحقیقات کی بنیاد پر جائے وقوعہ پر کسی بھی قسم کی مشتبہ سرگرمی کا شبہ نہیں تھا۔ دوسری جانب ان کی انتظامی کمپنی کی طرف سے ایک بیان میں کہا گیا ہے کہ طبی عملے کی بہترین کوششوں کے باوجود شین وارن کی جان نہیں بچائی سکی۔علاوہ ازیں دنیائے کرکٹ کے مایہ ناز لیگ اسپنر شین وارن نے انتقال سے 12 گھنٹے قبل راڈنی مارش کے انتقال پر تعزیت کا اظہار کیا تھا جو وائرل ہوگیا ۔شین وارن نے اپنے ٹوئٹر پیغام میں لکھا تھا کہ راڈنی مارش کی موت کا سن کر افسوس ہوا، وہ ایک لیجنڈ تھے انکی وجہ سے کئی نوجوان بچوں نے آسٹریلیا کی نمائندگی کا عزم کیا۔ انہوں لکھا کہ میری جانب سے انکے اہلخانہ کیلئے دلی ہمدردی!۔سابق آسٹریلوی کرکٹ اور لیگ اسپن کی یونیورسٹی کہلائے جانے والے شین وارن 1992 سے 2007 تک آسٹریلیا کی نمائندگی کی اور 145 ٹیسٹ میں 708 وکٹیں حاصل کیں۔اسی طرح ون ڈے 194 ایک روزہ میچز میں 293 اور 73 ٹی ٹوئنٹی میں 70 وکٹیں حاصل کی تھیں۔دوسری جانب پاکستان اور آسٹریلیا کے درمیان راولپنڈی میں جاری ٹیسٹ میچ کے دوسرے روز کھیل سے قبل آسٹریلین لیجنڈ شین وارن کی یاد میں اور پشاور دھماکے کے لواحقین سے اظہارِ ہمدردی کے لیے ایک منٹ کی خاموشی اختیار کی گئی۔دونوں ٹیموں کے کھلاڑیوں نے لیجنڈ شین وارن کو سیاہ پٹیاں باندھ کر کو خراج عقیدت پیش کیا۔
