اسلام آباد (مانیٹرنگ ڈیسک )نیب راولپنڈی کے ریفرنس میں بی فوريوکےمالک سیف الرحمان نیازی کو مرکزی ملزم نامزد کیا گیا ہے۔سیف الرحمان نیازی کی بیوی اور بیٹوں سمیت6 ملزمان نامزد کئے گئے ہیں۔نجی ٹی وی سماء کے مطابق نیب ریفرنس میں بتایا گیا ہے کہ اسٹیٹ بنک سے تصدیق ہوئی کہ ملزمان سرمایہ کاری جمع کرنے کا لائسنس نہیں رکھتے

اور دھوکہ دہی سے 16 ارب روپے سے زائد کی سرمایہ کاری جمع کی گئی۔ریفرنس میں مزید بتایا گیا کہ 56 اکاؤنٹس کا استعمال کرکےعوام سے رقم جمع کی گئی،ملزمان کی کوئی کمپنی منافع میں نہیں لیکن لوگوں کو7سے20 فیصد منافع کا لالچ دیاجاتا رہا اور ملزمان نے دھوکہ دہی سے لوگوں کواپنا کاروبار قانونی ظاہر کیا۔ریفرنس میں یہ بھی درج ہے کہ ملزمان کوواحد مقصد لوگوں کی محنت کی کمائی لوٹ لینا تھا۔احتساب عدالت اسلام آباد کے جج محمد بشیر نے سیف الرحمن نیازی کی رائیونڈ لاہور میں 113کنال اراضی اور اُن کی اہلیہ کے نام پلاٹ منجمد کرنے کا حکم دیا۔جنوری میں نیب نے بی فاریو نامی کمپنی کے سربراہ سیف الرحمن نیازی اوراُن کی اہلیہ کی مزید 2 جائیدادیں ضبط کرلی تھیں۔بی فاریوکمپنی کے سربراہ سیف الرحمن نیازی اوران کی اہلیہ کی جائیدادیں ضبط کرنےکےنیب کے اقدامات کی احتساب عدالت نے نیب کے فیصلے کی توثیق کی۔نیب نے ضبط کی جانے والی جائیدادوں کے فیصلوں کی توثیق کے لیے احتساب عدالت سے رجوع کیا تھا۔جج نے استفسار کیا کہ اس کیس میں کتنے شکایات کنندہ ہیں جس پر تفتیشی افسر نے عدالت کو بتایا کہ کیس میں پانچ ہزار سے زائد شکایات نیب کو مل چکی ہیں جن کا پیسہ سرمایہ کاری کے نام پرلوٹا گیا ہے۔