اسلام آباد (این این آئی)ملک بھر کی ایمرجنسی ہیلپ لائنز کو قومی ہیلپ لائن کے ساتھ منسلک کرنیکا منصوبہ تیار کر لیا گیا، وزیراعظم عمران خان یکم رمضان المبارک کو قومی ہیلپ لائن 911 کا افتتاح کریں گے۔

ذرائع کے مطابق 911 ہیلپ لائن ملک بھرکی تمام ایمرجنسی ہیلپ لائن کیساتھ منسلک ہوگی جس پر کال کرنے سے تمام ایمرجنسی رسپانس اداروں سے رابطہ ممکن ہو گا۔وزیراعظم کی زیر پاکستان ایمرجنسی ہیلپ لائن 911 پر جائزہ اجلاس ہوا جس میں وزیراعظم نے کہا کہ لوگوں کی جان ومال کاتحفظ ہماری اولین ترجیح ہے ہیلپ لائن کاآغازلوگوں کیلئے ون اسٹاپ ایمرجنسی ریلیف پوائنٹ ہو گا۔وزیراعظم کو بریفنگ میں بتایا گیا کہ فائربریگیڈ، پولیس، ہیلتھ اسسٹنس، ڈیزاسٹرریکوری کو ضم کر دیا جائیگا، موٹروے پولیس و دیگر 36 انفرادی ایمرجنسی نمبرز کو بھی 911 میں ضم کیاجائیگا۔ضرورت مند کو صرف 911ڈائل کرنا ہو گا جس کے بعد کال سینٹراس کی کال کومتعلقہ سرکاری ایجنسی کوبھیج دے گا۔ منصوبہ وزارت آئی ٹی اوروزارت داخلہ کامشترکہ منصوبہ ہے۔وزیراعظم نے ہدایت کی کہ متعلقہ حکام آپریشن کو یقینی بنانے کیلئے تمام ضروری اقدامات کریں۔