اسلام آباد ( آن لائن )پاک بھارت آبی تنازعات پر مذاکرات بلا نتیجہ ختم ہو گئے جبکہ رواں سال مذاکرات کا آئندہ راونڈ بھارت میں ہو گا۔انڈس واٹر کمشنرز نے رواں سال 31مئی سے قبل ایک اور مذاکراتی راونڈ پر اتفاق کر لیا۔

ذرائع وزارت آبی وسائل کے مطابق اسلام آبادمیںپاک بھارت آبی تنازعات پر مذاکرات کا اغاز ہو ا توپاکستان نے دریائے سندھ، چناب اور پونچھ پر 10 بھارتی ڈیموں کے ڈیزائن پر اعتراض کرتے ہوئے موقف اپنایا کہ بھارت 2019 سے دریاؤں میں پانی کے بہاؤ کا ڈیٹا شیئر نہیں کر رہا اور آپ کی وجہ سے پاکستان کو سیلابی صورتحال کا سامنا کرنا پڑتا ہے جس پر بھارت نے متنازعہ ڈیمز پر پاکستان کے اعتراضات ماننے سے انکار کر تے ہوئے پاکستان کیساتھ پانی کے بہاو کا ڈیٹا شیئر کرنے سے انکار کر دیا اور کہاکہ سندھ طاس معاہدے میں پانی کا ڈیٹا شیئر کرنے کی کوئی شق شامل نہیں۔ انڈس واٹر کمشنرز نے رواں سال 31مئی سے قبل ایک اور مذاکراتی راونڈ پر اتفاق کر لیا،رواں سال مذاکرات کا آئندہ راونڈ بھارت میں ہو گا، ذرائع کے مطابق اگلے راونڈ میں بھارت پاکستان کو متنازع پن بجلی منصوبوں پر تفصیلات فراہم کرے گا۔