اسلام آباد(این این آئی)قومی اسمبلی میں قائد حزب اختلاف اور مسلم لیگ ن کے صدر شہباز شریف کو وزیراعظم عمران خان کے خلاف تحریک عدم اعتماد سے روکنے کے

لیے سپریم کورٹ میں درخواست دائر کردی گئی۔میڈیا رپورٹ کے مطابق سپریم کورٹ میں شہباز شریف کیخلاف درخواست شہری شاہد اورکزئی نے دائر کی، جس میں مؤقف اختیارکیا گیا ہے کہ سپریم کورٹ پر حملہ کی سازش کیس میں ملوث ہونے پر شہباز شریف اپوزیشن لیڈر منتخب نہیں ہو سکتے۔درخواست میں مؤقف اختیار کیا گیا کہ شہباز شریف وزیراعظم کے خلاف عدم اعتماد کی تحریک لانے کی سربراہی کر رہے ہیں جبکہ شہباز شریف پر سپریم کورٹ پر حملہ کرنے کا جرم ثابت ہوچکا ہے۔درخواست گزار نے لکھا کہ شہباز شریف کو بطور اپوزیشن لیڈر اقدامات اٹھانے سے روکا جائے اور اْن کی عام انتخابات 2008 اور 2013 کی کامیابی کو کالعدم قرار دیا جائے۔درخواست میں استدعا کی گئی ہے کہ ایسی صورت میں شہباز شریف اپوزیشن لیڈر منتخب نہیں ہو سکتے اور نہ وہ مسلم لیگ کے صدر بن سکتے ہیں، لہذا انہیں عوامی اور پارٹی عہدوں سے ہٹایا جائے۔