لندن (نیوز ڈیسک) برطانیہ میں ایک خاتون مچھر کے کاٹنے سے نابینا ہوگئی ہیں۔ 69سالہ خاتون کیریبین میں چھٹیاں گزار رہی تھیں، جہاں انہیں مچھر نے کاٹ لیا جس کے بعد انہیں چکنگنیا نامی بخار نے آگھیرا جس کے بعد ان کی دائیں آنکھ کی بینائی ختم ہوگئی۔ اس خبر نے ماہرین کو یہ سوچنے پر مجبور کردیا ہے کہ مچھر کے کاٹنے اور اس کیڑے کے ذریعے آلودہ خون کی منتقلی سے ہونے والی بیماریوں میں نظر کی کمزوری بھی کہیں شامل تو نہیں جس پر ماہرین کی تاحال توجہ ہی نہیں گئی۔ اس مرض کا شکار خاتون کا علاج کرنے والے اور بعد ازاں رپورٹ مرتب کرنے والے ڈاکٹر ابھیجیت موہت کا کہنا ہے کہ ممکن ہے کہ یہ چکنگنیا نامی بخار کے مضر اثرات تھے یا مچھر کی وجہ سے ایسا ہوا، اس بارے میں سوچنا پڑے گا۔ اس کے علاوہ یہ بھی سوچنے کی ضرورت ہے کہ وہ افراد جو کہ بینائی زائل ہونے کا علاج بروقت کروالیتے ہیں، ان کی بینائی ضائع ہونے سے بچ رہتی ہے۔
خاتون گزشتہ برس جولائی میں کیریبیئن گئی تھیں جہاں انہیں مچھر نے کاٹ لیا جس کے بعد انہیں فلو جیسی علامات پیدا ہوگئی تھیں۔ اس کے علاوہ شدید بخار، سرخ دھبے اور جوڑوں میں درد کی شکایت بھی پیدا ہوگئی تھی۔ خاتون کچھ دن بعد برطانیہ واپس آگئی تھیں جہاں ان کی بیماری ٹھیک ہوگئی تاہم دائیں آنکھ سے بینائی زائل ہونے لگی۔ اس کے تین ہفتے بعد وہ معالج کے پاس گئی ، جہاں اس کی طبی تاریخ معلوم کرنے کے بعد اس کا بلڈ ٹیسٹ کیا گیا جس سے چکنگنیا کا انکشاف ہوا۔ اس کے بعد دیگر ٹیسٹ مکمل ہونے میں مزید چھ ہفتے کا وقت ضائع ہوا جس کے بعد خاتون کے علاج کیلئے سٹیرائڈز دیئے گئے مگر اس وقت تک بینائی فراہم کرنے والے اعصابی خلئے ختم ہوچکے تھے۔ ماہرین کو اگرچہ یقین ہے کہ اس کی وجہ مچھر کے کاٹنے سے یہ مسئلہ پیدا ہوا تاہم پھر بھی وہ دیگر امکانات کا بھی جائزہ لینے کا ارادہ رکھتے ہیں۔ برطانیہ میں اپنی نوعیت کا یہ پہلا کیس شناخت ہوا ہے۔