پشاور /مانسہرہ (مانیٹرنگ، این این آئی)چترال لواری ٹنل اور دیر روڈ پر بھی برف باری کے باعث گاڑیاں پھنس گئیں، سیاح چترال کی طرف سفر کرنے سے گریز کریں، ضلعی انتظامیہ نے عوام سے اپیل کر دی ہے، صوبہ خیبرپختونخوا کے ضلع مانسہرہ کے سیاحتی مقامات کاغان، ناران اور شوگران کو ہر قسم کی ٹریفک کیلئے بند کردیا گیا۔ڈپٹی کمشنر (ڈی سی) مانسہرہ قاسم علی خان کے مطابق
کیوائی کے مقام پرسیاحوں کے آگے جانے پر پابندی عائد کردی گئی ۔انہوں نے کہا کہ پابندی اگلے نوٹیفکیشن جاری ہونے تک برقرار رہے گی۔ڈپٹی کمشنر کا کہنا ہے کہ صرف ایمرجنسی گاڑیوں کو آگے جانے کی اجازت ہوگی۔ریسکیو1122ایبٹ آبادنے باڑہ گلی میں پھنسی 17سیاحوں کی گاڑیوں کونکال کرحفاظتی مقام کی طرف بھیج دیا،ترجمان ریسکیو1122ایبٹ آبادکے مطابق ہفتہ کے روزریسکیوٹیموں نے شدید برفباری کے دوران گلیات کے علاقے باڑہ گلی میں پھنسی ہوئی سیاحوں کی 17گاڑیوں اور25افرادکونکال کرحفاظتی مقام کی طرف بھیجتے ہوئے خشک کھانابھی مہیاکیا،ترجما ن کے مطابق ریسکیوٹیموں کاسیاحوں کی گاڑیوں کونکالنے کاآپریشن تیز کر دیا ہے اور نتھیاگلی سٹیشن کے اہلکارسیاحوں کوخدمات فراہم کرنے میں مصروف عمل ہیں۔دوسری جانب ایبٹ آباد کے سیاحتی مقام نتھیاگلی میں مسلسل بارش اور شدید برف باری سے لینڈ سلائیڈنگ کا خطرہ بڑھ گیا، سیاحوں کی سہولت اور بہتری کیلئے باڑیاں اور ہرنو کے مقامات پر ایبٹ آباد پولیس نے ناکہ بندیاں کر کے گلیات میں سیاحوں کے داخلہ پر مکمل پابندی عائد کر دی ہے اور ہدایت کی کہ مقامی افراد بھی غیر ضروری سفر سے اجتناب کریں، گلیات میں سیاح از حد احتیاط کو مدنظر رکھ کر واپسی کا سفر اختیار کریں۔ ترجمان ایبٹ آباد پولیس نے کہا کہ سیاحوں کو برف اور لینڈ سلائیڈنگ کے خطرے کے پیش نظر مشکلات درپیش آ سکتی ہیں،
موجودہ حالات بے حد محتاط ڈرائیونگ کے متقاضی ہیں، ایبٹ آباد پولیس آپ کی حفاظت اور سہولت کیلئے تمام وسال بروئے کار لاتے ہوئے 24 گھنٹے مصروف عمل ہے۔ ترجمان کا کہنا ہے کہ گذشتہ رات ضلع ایبٹ آباد کی حدود سے چھ فیملیوں کو ریسکیو کرتے ہوئے مقامی ہوٹلوں تک پہنچایا گیا، کسی بھی ایمرجنسی کی صورت میں پولیس کنٹرول نمبر 0992-9310033 پر رابطہ کیا جا سکتا ہے۔ ضلعی پولیس سربراہ ظہور بابر آفریدی نے عوام الناس سے اپیل کی ہے کہ موجودہ شدید موسمی حالات کے پیش نظر گلیات اور ٹھنڈیانی کے علاقوں میں سفر سے گریز کریں۔
