راولپنڈی (این این آئی)پاک فوج کے ترجمان میجر جنرل بابر افتخار نے واضح کیا ہے کہ سابق وزیر اعظم اور مسلم لیگ (ن) کے قائد محمد نوازشریف سے سے ڈیل کی خبریں بے بنیاد ہیں۔ بدھ کو یہاں پریس کانفرنس کے دور ان ایک سوال کے جواب میں ڈی جی آئی ایس پی آر نے واضح کیا کہ
نواز شریف سے ڈیل کی خبریں بے بنیاد ہیں۔ انہوںنے کہاکہ اگر کوئی ڈیل کی بات کرتا ہے تو انہی سے سوال کریں کہ ڈیل کون کر رہا ہے، پوچھا جائے کہ نواز شریف کے ساتھ ڈیل کے محرکات کیا ہیں؟ کیا شواہد ہیں؟ سول ملٹری تعلقات میں کوئی مسئلہ نہیں ہے، اسٹیبلشمنٹ کو اس مسئلے سے باہر رکھیں۔ایک سوال پر انہوں نے کہا کہ ایسی تمام سرگرمیوں سے نہ صرف آگاہ ہیں، ان کے لنکس سے بھی آگاہ ہیں، یہ لوگ پہلے بھی ناکام ہوئے تھے، اب بھی ناکام ہوں گے، اس مہم کا مقصد حکومت، عوام اور اداروں کے درمیان خلیج پیدا کرنا ہے، فیک نیوز کے ذریعے اداروں کو نقصان پہنچانے کے درپے ہیں، شام کو پروگرامز میں کہا جاتا ہے کہ اسٹیبلشمنٹ نے یہ کر دیا، وہ کر دیا۔
