کراچی(این این آئی)جمعیت علماء اسلام کے مرکزی جنرل سیکرٹری اور سابق ڈپٹی چیئرمین سینٹ سینیٹر مولانا عبدالغفور حیدری نے کہا ہے کہ بابری مسجد کی شہادت پر احتجاج کے وقت ہندوستانی حکومت کافر ہے کے نعرے لگے،اسلامی مملکت میں مسجد گرانیکا فیصلہ نہیں ہونا چاہیے،

مدینہ مسجد طارق روڈ میں اجتماع سے خطاب کرتے ہوئے کہا کہ قیام پاکستان کی آزادی کے اصل مقاصد اسلامی مملکت کی تھی،حکومت کو ریاست مدینہ کا نام لیتے وقت شرم آنی چاہئے۔انہوں نے کہا کہ متنازعہ فیصلے نہ کیے جائیں۔قوم کے ساتھ ظلم کیا گیا۔ ہزاروں لوگوں کو بیزروگار کیا گیا ۔ملک میں کوئی مقدس گائے نہیں ہم ان سب کا تعاقب کریں گے۔40 سالہ قدیم مدینہ مسجد کی تمام قانونی دستاویزات مکمل ہیں۔ ہم ان کے خوابوں کو شرمندہ تعبیر ہونے نہیں دیں گے۔انصاف کے ادارے قوم کے عقائد اور ایمان کا مذاق نہ اڑائیں۔ انہوں نے کہا کہ نسلے ٹاور سمیت ہزاروں غریبوں کی آبادیاں گرائی گئیں ۔لوگوں کی عمر بھر کی پونجی سے بنائے گھر ان سے چھین لئے گئے۔ جن سے گھر چھینے گئے ان کی زندگی بدتر ہوچکی ہے۔ مولانا عبدالغفور حیدری نے کہا کہ حکومت سندھ خوب خرگوش سے بیدار ہو۔اگر مدینہ مسجد کو کچھ ہوا تو سندھ حکومت کا گریبان پکڑیں گے۔عدالت سے درخواست ہے کہ وہ مدینہ مسجد کے فیصلہ پر نظر ثانی کریں۔