لاہور(این این آئی)قاتلانہ حملے میں زخمی ہونے والے مسلم لیگ (ن) کے رکن پنجاب اسمبلی بلال یاسین کے کیس میں پولیس کے ہاتھ اہم سراغ لگ گیا ہے،پولیس کو حملہ آوروں کا پستول مل گیا جسے فرانزک کے لئے بھجوا دیا گیا۔ تفصیلات کے مطابق بلال یاسین پر قاتلانہ حملے کی تحقیقات میں پیشرفت ہوئی ہے،بلال یاسین پر قاتلانہ حملے میں استعمال ہونے والا پستول پولیس کو مل گیا ہے۔ بتایا گیا ہے کہ ملزمان نے جس پستول سے فائرنگ کی وہ فرار ہوتے ہوئے ان کے ہاتھ سے گر گیا تھا۔پستول کس کے نام رجسٹرڈ ہے اس کی تحقیقات کی جارہی ہیں جبکہ پستول کو فرانزک کے لیے بھی بھجوا دیا گیا ہے۔