لاہور( این این آئی)قاتلانہ حملے میں زخمی ہونے والے رکن پنجاب اسمبلی بلال یاسین نے کہا ہے کہ حملہ کرنے والوں نے ڈولفن پولیس کی طرح کی جیکٹس پہن رکھی تھیں، میں اکثر حلقے میں موٹر سائیکل پر ہی جاتا ہوں ، میری کسی سے دشمنی نہیں ہے ، جب تک فائرلگنے سے میں زمین پر گر نہیں گیا تب تک مجھے یقین نہیں آیا کہ حملہ آوروں نے مجھے ہی

ٹارگٹ کیا ہے ۔ نجی ٹی وی سے گفتگو کرتے ہوئے بلال یاسین نے کہا کہ میں نماز جمعہ کے بعد معمول کے مطابق حلقے کے دورہ پر نکلا  ، اگر زیادہ دور نہ جانا ہو تو میں اکثر موٹر سائیکل پر ہی جاتا ہوں ۔ گزشتہ روز میں اپنے حلقے کے مختلف علاقوں کادورہ کیا ، سمادھی گنگا رام کے قریب مغرب کی نماز پڑھی اور پھر اپنے دفتر آ گیا اور وہاں جوس پیا ۔ہم تین چار لوگ باتیں کر رہے تھے کہ اسی دوران نئی موٹر سائیکل پر دو لڑکے آئے جنہوں نے ڈولفن پولیس کی طرح کی جیکٹس پہن رکھی تھیں انہوں نے فائرنگ کر دی اورمجھے یقین نہیں آرہا تھاکہ میرے اوپر فائرنگ کی گئی ہے ،جب میں گولیاں لگنے سے نیچے گر گیا تو مجھے یقین ہو اکہ مجھے ہی ٹارگٹ کیا گیا ہے ۔ انہوں نے کہا کہ میری کسی سے ذاتی دشمنی نہیں ہے اگر ایسا ہوتا تو میں حلقے میں تنہا نہ نکلتا ۔ نجی ٹی وی نے 7بجکر43منٹ پر حملہ آوروں کی موہنی روڈ سے گزرنے کی ویڈیو بھی جاری کی ہے جس میں دیکھا جا سکتا ہے کہ دو افراد بغیر نمبر پلیٹ موٹر سائیکل پر سوار ہیں اور انہوں نے کالے رنگ کی جیکٹس پہن رکھی ہیں۔ مزید بتایا گیا ہے کہ پولیس نے جائے وقوعہ اور ملحقہ گلیوں میں واقع عمارتوں سے سی سی ٹی وی فوٹیجز حاصل کر لی ہیں جبکہ علاقے کی جیو فینسنگ کرانے کا بھی فیصلہ کر لیاگیا ہے ۔