اسلام آباد (آن لائن) وفاقی وزیر برائے مواصلات مراد سعید نے کامیاب جوان لون اسکیم سے مستفید ہونے والے خیبر پختونخواہ کے کامیاب جوان کی وڈیو ٹویٹ کردی۔ مراد سعید نے اپنے ٹویٹ میں لکھا کامیاب جوان پروگرام کے توسط سے نہ صرف نوجوانوں کو کاروبار کرنے میں آسانی حاصل ہورہی ہے بلکہ روزگار کے مواقعوں میں بھی اضافہ ہو رہا ہے۔ انہوں نے کہا اب تک ملک بھر

میں 34 ارب روپے کے قرضہ جات 23 ہزار سے زائد کاروباروں کے لئے منظور ہوچکے ہیں۔ انہوں نے کہا خیبرپختونخوا میں 2 ارب روپے مالیت کے قرضہ جات کی منظوری سے صوبے میں کاروبار کو خاطرخواہ بڑھوتری حاصل ہوئی۔ انہوں نے کہا خیبرپختونخواہ میں کامیاب جوان اسکلزفار آل پروگرام کے تحت لگ بھگ 64 کروڑ روپے کی لاگت سے 12 ہزار نوجوانوں کو ہنر سکھا کر ان کے لئے روزگار کا حصول آسان بنا دیا گیا ہے۔ انہوں نے کہا خیبرپختونخواہ میں کامیاب جوان پروگرام سے نوجوانوں کو ہنرمند اور خوشحال بنانے کے لئے اب تک مجموعی طور پر2.6 ارب روپے خرچ کئے جا چکے ہیں۔ انہوں نے کہا پارہ چنار سے تعلق رکھنے والے نوجوان مجاہد سنتوری نے قرض حاصل کر کے موٹر سائیکلوں کی ریپئر اور خرید و فروخت کا کاروبار بڑے پیمانے پر بڑھا دیا۔ نوجوان مجاہد سنتوری کا کہنا ہے کہ یہ پروگرام وزیراعظم عمران خان کا بہت اچھا اقدام ہے۔ انہوں نے کہا کاربار بڑھانے سے ورکر اور مکینک بھی مزید رکھے ہیں۔ مقامی کالج کے طلبہ میری ورکشاپ پہ آکر مکینکل شعبے میں مفت ہنر سیکھ سکتے ہیں۔انہوں نے کہا قرض ملنے سے ہمارے پاس سہولتیں آگئیں ہیں سپئیر پارٹس زیادہ آگئے ہیں۔ ملازم ورکشاپ کامیاب جوان پروگرام سے میرا اور میرے جیسے چھوٹے تاجروں کا بہت بھلا ہوا ہے۔ مراد سعید نے کہا کامیاب جوان پروگرام کی لون اسکیم سے ملک بھر میں کاروبار کو فروغ حاصل ہوا ہے۔ ۔ وزیر اعظم عمران خان کے ویژن کے مطابق کامیاب جوان پروگرام پاکستان کے نوجوانوں کو با اختیار بنانے کا ایک انقلابی منصوبہ ہے جس پہ کامیابی سے عملدرآمد جاری ہے۔