اسلام آباد(نیوز ڈیسک)آج کل کرائے پر مکان لینا بہت مشکل ہوچکا ہے اور اس کی بنیادی وجہ آسمان کو چھوتے کرائے ہیں، لیکن ایک برطانوی شخص نے اپنا شاندار مکان نہ صرف ایک پانڈ (تقریباً 150 روپے) ماہانہ کرائے پر پیش کردیا بلکہ ساتھ خود کو بطور غلام بھی پیش کردیا۔یہ ناقابل یقین پیشکش ایک اشتہار کی صورت میں Flatshare.com ویب سائٹ پر ظاہر ہوئی اور اس کا انکشاف 34 سالہ شخص رچی واکر نے کیا۔ رچی کا کہنا ہے کہ وہ ایک پانڈ ماہانہ کرائے کا سن کر کافی حیران ہوا اور مکان لینے کیلئے مطالبہ کیا۔ اسے اصل بات کا پتہ بعد میں چلا کہ مکان کا 63 سالہ مالک خود کو غلام کے طور پر پیش کررہا ہے اور مکان لینے کیلئے یہ شرط قبول کرنا ضروری تھی۔رچی کا کہنا ہے کہ وہ اس قسم کی پیشکش سے کافی گھبرا گئے اور اپنی بیوی کے ساتھ ایسے گھر میں رہنے پر تیار نہ ہوسکے کہ جس کا مالک ان کا غلام بن کر رہنا چاہ رہا تھا، کہ نجانے اس کا اصل ارادہ کیا تھا۔ ادھیڑ عمر شخص کا کہنا تھا کہ وہ جنسی غلام نہیں بننا چاہتا، محض گھریلو غلام کے طور پر رہنا چاہتا ہے۔ یہ عجیب و غریب قسم کا اشتہار اب ویب سائٹ سے ہٹایا جاچکا ہے۔