اسلام آباد (آن لائن) وفاقی وزیر اطلاعات و نشریات فواد چوہدری نے سری لنکن ہائی کمیشن کا دورہ کر کے سیالکوٹ میں پیش آنے والے واقعہ پر افسوس کا اظہار کیا۔ منگل کے روز وفاقی وزیر اطلاعات فواد چوہدری نے سری لنکن ہائی کمیشن کے سفیر سے ملاقات کی اور انہیں سانحہ سیالکوٹ سے متعلق حکومت کی جانب سے اٹھائے گئے اقدامات سے آگاہ کیا
انہوں نے سیالکوٹ واقعہ کی ملک بھر میں مذمت کی اور کہا کہ سانحہ سیالکوٹ میں ملوث تمام ملزمان کو گرفتار کرلیا گیا ہے اور انہیں قانون کے مطابق سخت اور مثالی سزا دی جائے گی ۔اس موقع پر سری لنکن ہائی کمشنر نے کہا حکومت پاکستان کے اقدامات سے مطمئن ہیں۔ انہوں نے کہا سانحہ سے دونوں ممالک کے تعلقات پر کوئی منفی اثرات مرتب نہیں ہوں گے۔
