اسلام آباد(مانیٹرنگ ڈیسک/این این آئی )وفاقی وزیر تعلیم شفقت محمود نے کہا ہے کہ مستقبل ڈگریوں کا نہیں بلکہ ہنر(Skills)کا ہے۔ انہوں نے کہا کہ ایک لاکھ 70 ہزار لوگوں کو ہم ہنر کی تربیت (ٹریننگ) دے رہے ہیں۔تفصیلات کےمطابق وفاقی وزیر تعلیم شفقت محمود نے

مقامی ہوٹل میں منعقدہ تقریب سے خطاب کرتے ہوئے کہا کہ ہمارے زمانے میں ڈگری سب کچھ تھی مگر آنے والے وقت میں ڈگریوں کی ضرورت نہیں پڑے گی۔ قبل ازیں وفاقی وزیرتعلیم شفقت محمود نے کہا ہے کہ کورونا کے اومیکرون ویریئنٹ پر طلبا ء اور والدین کو خدشات ہیں لیکن تعلیمی اداروں کو اس سال کھلا رکھنا چاہتے ہیں، امتحانات کا بروقت انعقاد یقینی بنائیں گے۔میڈیا رپورٹ کے مطابق وفاقی وزیرتعلیم شفقت محمود نے کہا کہ حکومت پنجاب کی جانب سے سموگ کی وجہ سے تعلیمی اداروں کو تین دن کے لئے چھٹی دینے کے فیصلے کا جائزہ لے رہے ہیں۔ ایک سوال کے جواب میں انہوں نے کہا کہ ملک نے کورونا وبا ء کا بہادری سے مقابلہ کیا۔انہوں نے زور دیا کہ کورونا کے نئے ویرئنٹ اومیکرون کے مقابلے کے لئے ویکسینیشن اور ایس اوپیز پر عمل درآمد ضروری ہے۔سنگل سلیبس پر حکومت اپنے فیصلے پر صحیح معنوں میں عمل درآمد کے لئے پرعزم ہے ۔انہوںنے کہا کہ سکولوں میں اسپورٹس کے فروغ کی ضرورت پر زور دیا اور کہا کہ صحتمندانہ سرگرمیوں کے فروغ کے لئے انٹر یونیورسٹی اور انٹر بورڈز اسپورٹس ایونٹس متعارف کرائے گئے ہیں۔