اسلام آباد ، جہلم  (مانیٹرنگ ڈیسک ،این این آئی )وزیراعظم عمران خان پاکستان تحریک انصاف کی کور کمیٹی کے اجلاس میں وفاقی وزرا اور کمیٹی ارکان سے خفا خفا دکھائی دیے۔ذرائع کے مطابق دوران اجلاس وزیراعظم نے وفاقی وزرا اور کمیٹی ارکان سے شکوہ کرتے ہوئے کہا کہ

کوئی بھی معاملہ ہو آپ ایک ساتھ نظر نہیں آتے۔عمران خان نے کہا کہ چند ہفتوں سے وزرا اور پارٹی قیادت فرنٹ فٹ پر نظر نہیں آئی، دوران اجلاس وزیر اعظم نے وزرا کو تحریک کے ساتھ ہونے والے معاہدے پر بات کرنے سے بھی روک دیا۔اس دوران عمران خان نے ایم کیو ایم کی مثال دے کر کہا کہ جب وہ ایم این اے تھے تو ایم کیو ایم کے 18 کے 18 ارکان یک زبان ہو کر بولتے تھے۔وزیراعظم نے اس دوران کور کمیٹی ارکان کو فواد چوہدر ی اور اعظم سواتی کے ہمراہ الیکشن کمیشن میں پیش ہونے کی بھی ہدایت کی۔ دوسری جانب حکومت اور تحریک کے معاہدے کے بعد لاہور سے پنڈی کے درمیان دریائے جہلم کے پل سے رکاوٹیں ہٹا دی گئیں، سرائے عالمگیر اور جہلم کے درمیان ٹریفک بحال ہوگیا۔وزیر آباد اور گجرات کے درمیان چناب کا پل بدستور بند رہا، وزیر آباد، گجرات اور گوجرانوالہ میں انٹرنیٹ سروس بند رہی۔احتجاج کے باعث معطل کی گئی ٹرینوں کا شیڈول بحال کردیا گیا۔یاد رہے کہ گزشتہ روز مظاہرین نے

وزیرآباد میں جی ٹی روڈ خالی کر کے قریبی پارک میں خیمے لگا لیے تھے۔ادھر دریائے چناب کے مقام پر کنٹینرز رکھے گئے ہیں اور خندق بھی پر نہیں کی جا سکی ہے، دریائے جہلم کے پل پر لگائے گئے کنٹینرز رات گئے ہٹا دیئے گئے تھے۔