اسلا م آبا د (آن لا ئن)وفاقی وزیر برائے انسانی حقوق شیریں مزاری کی بیٹی نے عمران خان پر جادو ٹونے کا الزام عائد کر دیا ہے، سماجی رابطے کی ویب سائٹ ٹوئٹر پر شیریں مزار ی اور ان کی بیٹی ایمان مزاری آمنے سامنے آ گئیں،
وفاقی وزیر برائے انسانی حقوق شیریں مزاری اور اِن کی بیٹی ایمان زینب مزاری کی سوشل میڈیا پر نوک جھونک ہو گئی۔سوشل میڈیا پر شیریں مزاری کی بیٹی ایمان زینب مزاری نے حکومت پر تنقید کرتے ہوئے بیان دیا کہ ملک جادو ٹونے سے ہی چلانا تھا تو قوم کا پیسہ اتنی بڑی کابینہ پر کیوں ضائع ہو رہا ہے، ملک کا مذاق جادو ٹونے سے اڑایا جا رہا ہے۔ایمان زینب مزاری نے مزید کہا کہ آپ چاہتے ہیں جادو کرنے والوں پر بات بھی نہ ہو، ایسا ہر گز نہیں ہوگا۔جس پر شیریں مزاری نے اپنی بیٹی کو جواب دیتے ہوئے کہا کہ شرمندہ ہوں کہ تم اس حد تک گر کر ذاتی حملے کر رہی ہو، بطور وکیل کسی ثبوت کے بنا الزامات لگانا ہتک عزت میں آتا ہے۔شیریں مزاری نے مزید کہا کہ تمام تنقید ناکام ہو تو ذاتی حملے کرنا شرمناک ہے۔یاد رہے کہ ایسا پہلی بار نہیں ہوا ہے کہ شیریں مزاری اور ان کی بیٹی کے درمیان سوشل میڈیا پر ایک دوسرے کے خلاف لفظی جنگ نہ ہوئی ہو اس سے پہلے بھی دونوں کے درمیان سیاسی بیانات پر اختلافات سامنے آتے رہے ہیں اور ایمان مزاری اپنا ردعمل دیتی رہی ہے۔
