اسلام آباد (مانیٹرنگ ڈیسک )ملک بھر میں اس وقت”سیاسی چڑیل،جادوٹونے کی سرکار اورپاکپتن کی چڑیل” ٹاپ ٹرینڈ بنا ہوا ہے ، یہ سلسلہ اس وقت شروع ہوا جب گزشتہ روز مسلم لیگ ن کی نائب صدر مریم نواز نے کہا تھا کہ عمران خان جادو ٹونے سے 22 کروڑعوام کا ملک چلارہے ہیں،انہوں نے کہا جب ملک کی اہم تقرریاں جادوٹونے اور جنات کرتے ہوں تو
پھر اس ملک کے اداروں کا تماشا ہی بنے گا، سمجھ نہیں آتا کہ اگر ان کا جنتر منتر کامیاب ہے تو عوام کی بھلائی کیلئے استعمال کیوں نہیں ہوتا، جنترمنترسے آٹاپٹرول ادویات سستی کیوں نہیں ہوتیں، وہ صرف اہم تقرریوں کیلئے کیوں استعمال ہوتا ہے، کیونکہ نئی تقرری ملک کا نہیں اپنی ذات کو بچانے کا مسئلہ ہے۔ جس کے جواب میں وزیر مملکت برائے اطلاعات و نشریات فرخ حبیب نے کہا تھا مریم صفدر جتنے مرضی جادوئی گلاس اٹھائیں، یا الہ دین کا چراغ رگڑیں، انہیں کرپشن کا حساب دینا ہو گا۔انہوں نے کہا کہ کرپشن کے مال سے بنائے لندن فلیٹس کی سزا جنتر منتر والے قطری خط سے ختم نہیں ہوگی۔وزیر مملکت نے کہا کہ لندن فلیٹس کی سزا طوطا فال والے جعلی کیلبری فونٹ سے بھی ختم نہیں ہوگی، مریم صفدر کے پاس سیاسی طور پر کہنے کو کچھ نہیں بچا۔اس جادو ٹونے کے حوالے سے معروف صحافی و اینکر پرسن عمران ریاض نے بھی اپنی ایک یوٹیوب ویڈیو میں دعویٰ کیا ہے کہ مریم نواز آج کل لاہور میں ایک
پیر سے مل رہی ہیں جو شریف خاندان پر آنے والی مصیبتوں کا توڑ کر رہا ہے۔ ان کے گھریلوملازمین بتاتے ہیں کہ وہ پیر ایک خواجہ سرا ہے جس نے مریم کو سٹیل کا گلاس دیا ہے۔ یہ پیر انہیں کہتا ہے کہ آپ پر وزیر اعظم ہائوس سمیت دیگر جگہوں سے جادو ہو رہا ہے اور وہ اس کا توڑ کر رہا ہے، یہ پیر صاحب اسی چکر میں اپنی دیہاڑیاں لگا رہے ہیں۔یاد رہے کہ خاتون اول بشریٰ بی بی کا تعلق پاکپتن سے ہے وزیر اعظم عمران خان پر الزامات ہیں کہ وہ انہی کے مشورے پر عمل کرتے ہوئے اہم حکومتی امور چلارہے ہیں ۔
