واشنگٹن(نیوزڈیسک)غیر ملکی خبر رساں ادارے کے مطابق امریکی ریاست کیلیفورنیا کے شہر لاس اینجلس میں ایک شخص سیروتفریح کر رہا تھا کہ اس دوران اسے جھاڑیوں میں ایک سانپ نظر آیا جسے اس نے دم کی طرف سے پکڑ کر باہر کھینچ لیا۔ باہر آنے پر پتا چلا وہ ایک ریٹل سنیک تھا جس کا شمار انتہائی زہریلے سانپوں میں ہوتا ہے۔ ریٹل سنیک کو دیکھ کر اس میں سیلفی لینے کا شوق بیدار ہوا اور وہ جیسے ہی سانپ کے ساتھ سیلفی بنانے لگا تو سانپ نے موقع غنیمت جان کر اس کے بازو پر ڈس لیا اور واپس جھاڑیوں میں فرار ہو گیا۔ سانپ کے زہر نے تیزی سے اثر دکھانا شروع کیا تو اس کے منہ سے جھاگ نکلنے لگا اور وہ درد کی شدت سے بری طرح تڑپنے لگا۔ متاثرہ شخص کو طبی امداد کے لئے قریبی ہسپتال لے جایا گیا جہاں زہر کے خاتمے کے لئے خصوصی تریاق دیا گیا تاہم زہر کی تاثیر اس قدر زیادہ تھی کہ اس کو متعدد بار انجیکشن لگانے پڑے یہاں تک کہ کیلیفورنیا کے دو ہسپتالوں کے اینٹی وینم انجکشنز کا سٹاک ختم ہوگیا۔ صحت یابی کے بعد جب امریکی شہری کو ہسپتال انتظامیہ کی جانب سے بل دیا گیا گیا تو اس کی آنکھیں ایک بار پھر پھٹی کی پھٹی رہ گئیں کیونکہ اس کی سیلفی کے شوق نے ہسپتال کا بل لاکھ ڈالرز سے زائد بنا دیا تھا۔