ریاض(این این آئی) سعودی شہری مساعد الشہرانی نے کہا ہے کہ کنگ فیصل اسپیشلسٹ ہسپتال نے اپنے یہاں زیر علاج میری بچی کو80لاکھ ریال کا ایک انجکشن مفت فراہم کیا ہے۔
عرب ٹی وی کے مطابق بچی کے والد نے بتایا کہ ان کی بچی عضلات کے موروثی مرض میں مبتلا ہے، اسے دنیا کا مہنگا ترین انجکشن تجویز کیا گیاجس کا نام زولگنسما ہے۔ سعودی ذرائع ابلاغ کے مطابق الشہرانی نے اس حوالے سے اپنے اکائونٹ پر جو ٹویٹ کیا وہ سوشل میڈیا پر خوب وائرل ہورہا ہے۔الشہرانی نے لکھا کیا کہ میری بیٹی کا علاج کنگ فیصل اسپیشلسٹ ہسپتال میں ہورہا ہے، حکومت نے اس کی زندگی کیلئے مجوزہ 80لاکھ کے انجکشن کا بندوبست آسانی سے کردیا، بلاشبہ سعودی عرب میں انسان انمول ہے۔یاد رہے کہ مذکورہ انجکشن موروثی خرابی سے پیدا ہونے والے مہلک مرض کی موثر دوا ہے، یہ مرض انسانی عضلات کواس حد تک کمزور کردیتا ہے کہ وہ چلنے پھرنے تک کے قابل نہیں رہتا۔
