واشنگٹن (این این آئی)امریکی سینیٹر لِنڈسے گراہم نے کہا ہے کہ پاکستان کو افغانستان کے تنازع کے ’پائیدار حل‘ کا حصہ بننا چاہیے۔انہوںنے یہ بات امریکا میں پاکستان کے
سفیر اسد مجید خان کے ساتھ خطے کے بارے میں بات چیت کرتے ہوئے کہی امریکی سینیٹر نے ٹوئٹر پر لکھا کہ افغانستان کے کسی بھی پائیدار حل میں پاکستان کو شامل ہونا چاہیے، یہ خطہ انتہائی پیچیدہ اور موجودہ دور نہایت خطرناک ہے۔انہوں نے کہا کہ ہم سب کو یاد رکھنا چاہیے کہ پاکستان ایک ایٹمی ہتھیاروں سے لیس ملک ہے۔لِنڈسے گراہم نے ٹوئٹر پر لکھا کہ امریکی شہریوں، ہمارے اتحادیوں اور دیگر ممالک کے انخلا میں مدد کرنے پر پاکستانی حکومت کی کوششوں کی تعریف کرتے ہیں۔امریکی سینیٹر کو ایک ٹویٹ میں جواب دیتے ہوئے پاکستانی سفیر نے کہا کہ انہوں نے سینیٹر لنڈسے گراہم سے افغانستان کی ابھرتی ہوئی صورتحال پر بات کی تھی اور انہیں افغانستان سے انخلا میں معاونت کے لیے پاکستان کی کوششوں سے آگاہ کیا۔
