دوحہ،کابل (این این آئی)افغانستان کی موجودہ صورتحال پر پر ملا برادرنے کہاہے کہ طالبان کی کامیابیوں کی مثال دنیا میں کہیں نہیں ملتی، یہ کامیابیاں اللہ تعالی کی نصرت اور مدد سے حاصل کیں، ہماری اصل ذمہ داریاں اب شروع ہونگی۔غیرملکی خبررساں ادارے کے مطابق
دوحہ میں طالبان آفس کے سربراہ ملا برادر کا افغانستان کی تازہ ترین صورتحال کے بعد پیغام سامنے آگیا، ملا برادر کا کہنا تھا کہ افغانستان میں طالبان کی فتوحات پر مبارکباد پیش کرتا ہوں جو اللہ تعالی کی نصرت اور مدد کے بغیر ممکن نہیں تھی۔انہوں نے کہا کہ ہماری اصل ذمہ داریاں ان فتوحات کے بعد اب شروع ہوتی ہیں جس میں افغان عوام کی خدمت اور انکے جان و مال کا تحفظ ہماری ذمہ داری بنتی ہے، افغان عوام کو یقین دلاتے ہیں کہ حالات کو بہتر کرنے میں بھرپور کردار ادا کریں گے۔دوسری جانب افغانستان کے موجودہ حالات پر سابق گورنر قندھار گل آغا شیر زئی نے کہاہے کہ افغان عوام سے مطالبہ ہے کہ امارات اسلامی طالبان مجاہدین کے ساتھ بھرپور تعاون کریں، قیام امن کے لیے طالبان مجاہدین کے ساتھ کردار ادا کرینگے۔میڈیارپورٹس کے مطابق سابق گورنر قندھار گل آغا شیر زئی کا افغانستان کی صورتحال پر پیغام سامنے آ گیا جس میں انہوں نے طالبان کو فتوحات پر مبارکباد پیش کی، گل آغا شیر زئی نے افغانستان میں کابل اور دیگر صوبوں کے عوام سے مطالبہ کیا کہ امارات اسلامی طالبان مجاہدین کے ساتھ بھرپور تعاون کریں، میں اپنے گھر افغانستان میں ہوں اور افغانستان میں قیام امن کے لیے طالبان مجاہدین کے ساتھ بھرپور تعاون کر رہے ہیں۔
