کراچی(این این آئی)کراچی میں پسند کی شادی کرنے پر لڑکی کے گھر والوں نے لڑکی کو گھر بلاکر کر تشدد کا نشانہ بنا کر قید کر دیا۔لڑکی کے شوہر کے مطابق تھانے کے

چکر لگانے پر بھی کوئی شنوائی نہیں ہو رہی، بیوی پر تشدد ہو رہا ہے، اعلی حکام میری بیوی کو اس کے اہلِ خانہ کی قید سے چھڑائیں۔لڑکی کے شوہر عادل نے میڈیاسے گفتگو کرتے ہوئے بتایا کہ ہم نے رواں سال اپریل میں پسند کی شادی کی تھی۔اس نے بتایا کہ لڑکی کے گھر والوں نے کہا کہ لڑکی کو گھر بھیج دو ہم باقاعدہ رخصتی کریں گے، گھر لے جا کر لڑکی کو اس کے والدین نے تشدد کا نشانہ بنایا۔لڑکے نے بتایا کہ میری بیوی میرے پاس واپس آنا چاہتی ہے، بیوی کو تشدد کر کے گھر میں باندھ کر رکھا گیا ہے۔عادل نے کہاکہ میں گلبرگ اور گلشن تھانے گیا لیکن وہاں میری کوئی شنوائی نہیں ہوئی، میرے سسر نے گلبرگ تھانے میں سب کے سامنے میرا نکاح نامہ پھاڑ دیا۔لڑکی کی اپنے شوہر کو بھیجی گئی آڈیوبھی منظرعام پر آئی ہے جس میں لڑکی بتا رہی ہے کہ اسے گھر میں باندھ کر رکھا گیا ہے اور تشدد کا نشانہ بنایا جا رہا ہے۔لڑکی کے شوہر نے کہاکہ اعلی حکام میری مدد کریں اور میری بیوی کو اس کے اہلِ خانہ کی قید سے چھڑائیں۔