ناگاساکی(نیوزڈیسک )دور جدید میں آہستہ آہستہ اب انسانوں کی جگہ روبوٹ لے رہے ہیں جب کہ جاپان میں ایک ایسا ہوٹل موجود ہے جہاں داخل ہوتے ہی آپ کو انسانوں کی بجائے روبوٹ خوش آمدید کہیں گے۔جاپان کے شہرناگا ساکی میں حال ہی میں افتتاح ہونے والے اس ہوٹل میں ایک رات کا کرایہ قریبا 8 ہزارپاکستانی روپے ہے، کمروں میں داخل ہونے کے لیے چابیاں اورسوئپ کارڈ نہیں دیئے جاتے بلکہ روبوٹ آپ کا چہرہ اسکین کرتے ہیں اوردروازہ کھل جاتا ہے۔ناگاساکی کے ہوئس ٹین بوش تفریحی پارک میں روبوٹ ٹیکنالوجی کو ہوٹل کے لیے استعمال کیا گیا ہے اور ہوٹل انتظامیہ کی خواہش ہے کہ اس کے 90 فیصد امور روبوٹ ہی انجام دیں تاکہ ملازموں کے اضافی اخراجات کم کیے جاسکیں۔ اس منفرد ہوٹل میں مہمان اپنی اشیا ایک ڈراپ باکس میں ڈالتے ہیں تو ایک روبوٹ بازو انہیں اٹھا کر طاق میں رکھ دیتا ہے، یہاں روبوٹ ٹرالی آپ کا سامان کمرے تک پہنچاتی ہے اور سائری نامی ایک روبوٹ موجودہ وقت اور موسم کا تازہ احوال بتاتا ہے۔اس کے علاوہ دلچسپ بات یہ ہے کہ ایک گڑیا روبوٹ آپ کی آواز پہچانتے ہوئے ناشتے کا آرڈر دیتی ہے اور کمرے کا اے سی آپ کے جسمانی درجہ حرارت کو نوٹ کرتے ہوئے خود کو ایڈجسٹ کرتا ہے جب کہ مہمان فون کے بجائے ٹیبلٹ پر احکامات دیتے ہیں۔