مریدکے(آن لائن) سابق وفاقی وزیر ریلوے خواجہ سعد رفیق اور سابق صوبائی وزیر صحت خواجہ سلمان رفیق نے رانا فارم ہاؤس مریدکے میں چیئرمین پبلک اکاؤنٹس کمیٹی رانا تنویر حسین کے ساتھ ملاقات کی اور ملکی سیاسی صورتحال پر تبادلہ خیال کیا۔سابق ایم این اے رانا افضال حسین، چیئرمین ضلع کونسل شیخوپورہ رانا احمد عتیق انور، چیئرمین میونسپل کارپوریشن مریدکے
میاں شبیر احمد، وائس چیئرمین راناماجد نواز، سینئر کونسلر سید اعجاز الحسن شیرازی، چیئرمین یونین کونسل رانا حسیب عامرکی موجودگی میں خواجہ برادران نے فارم ہاؤس پر موجود مسلم لیگ ن کے کارکنوں کے ساتھ تصاویر بنوائیں اور پارٹی کے لیے ان کی جدوجہد کو سراہا۔ خواجہ سعدرفیق نے کارکنوں سے گفتگو کرتے ہوئے کہا کہ تبدیلی کا نعرہ بلند کرکے عوام کو دھوکہ دینے والے حکمرانوں نے نہ صرف ملک کو تباہی کے دھانے پر لا کھڑا کیا ہے بلکہ ہر منصوبے میں کھربوں روپے کے سکینڈلز نے انہیں ڈاکو ثابت کر دیا ہے۔ انہوں نے کہا کہ کارکن”لٹ کے لے گئی، پی ٹی آئی”کا نعرہ بلند کرکے عوام کولٹیرے اور دھوکے باز حکمرانوں سے آگاہ کریں تا کہ یہ اپنے انجام کو پہنچ سکیں۔ خواجہ سعد رفیق نے کہا کہ عوام کو بھوکوں مارکر’الیکٹرانک ترقی’کا شور مچانے والے یاد رکھیں کہ آئندہ انتخابات میں ان کی پارٹی کا ٹکٹ حاصل کرنے والا کوئی نہیں رہے گا
