اسلام آباد (آن لائن) وفاقی وزیر سائنس وٹیکنالوجی فواد چوہدری نے کہا ہے کہ وزیراعظم عمران خان نے پی ڈی ایم کو حکومت کے ساتھ مشاورتی عمل میں شرکت کی دعوت دی ہے،ہماری کوشش ہے اپوزیشن کو مشاورتی عمل میں شامل کیا جائے ۔ میڈیا سے گفتگو کرتے ہوئے فواد چوہدری نے کہاہے کہ وزیراعظم عمران خان نے اپوزیشن اتحاد پی ڈی ایم کو حکومت کے ساتھ مشاورتی عمل

شروع کرنے کے لیے خط لکھ دیا ہے۔ انہوں نے تصدیق کی کہ حکومت اور اپوزیشن کے درمیان بیک ڈور رابطہ ہو رہا ہے۔فواد چوہدری نے کہا کہ حکومت کی اپوزیشن کے اہم رہنماؤ ں سے بات چیت ہوئی ہے، ہماری کوشش ہے کہ اپوزیشن کو مشاورتی عمل میں شامل کیا جائے۔وفاقی وزیر کا کہنا ہے کہ اپوزیشن کو بات کرنے کی دعوت دی اب فیصلہ عوام کریں گے، وزیر اعظم عمران خان نے اسپیکر قومی اسمبلی کو کہا تھا کہ اپوزیشن سے بات کریں، وزیر اعظم نے بھی انھیں خط لکھ دیا ہے اب ان پر ہے کہ وہ کیا کرتے ہیں۔ فواد چوہدری نے گفتگو میں اپوزیشن کو کرونا ویکسین کے معاملے میں مکمل لا علم قرار دیا، انھوں نے کہا اپوزیشن کو پتا ہی نہیں ہے کہ کرونا ویکسین کا معاملہ ہے کیا، ہمیں تو جانوروں والی ویکسینز بھی باہر سے منگوانی پڑتی ہے۔پاک بھارت رابطوں پر ایک سوال کے جواب میں انھوں نے کہا کہ پاکستان اور بھارت کے درمیان پیغام رسانی ہو رہی ہے، بھارت سے جو مرضی پیغام آ جائے، کشمیر کے بغیر آگے نہیں بڑھنا چاہیے۔ ایک سوال پر کیا کہ آپ وزارت اطلاعات میں کب آ رہے ہیں؟ اس کا جواب دیتے ہوئے فواد چوہدری نے کہا میں وزارت اطلاعات کا امیدوار نہیں ہوں۔‎