اسلام آباد(آن لائن) حکومت نے 500ارب روپے سالانہ خسارے سے دوچار سرکاری کمپنیوں سے متعلق بڑا فیصلہ کر لیاہے،وزیراعظم کی ہدایت پر اڑھائی سال بعد بالاخر فرانزک آڈٹ کی راہ ہموار ہوگئی۔ ذرائع کا کہنا ہے کہ اربوں روپے خسارے سے دوچار سرکاری کمپنیوں کا گذشتہ 10سالوں کا فرانزک آڈٹ ہوگا۔ذرائع کا کہنا ہے کہ پہلے مرحلے میں پاکستان ریلوے، پی آئی اے اور سوئی نادرن کے فرانزک آڈٹ کی منظوری دی گئی ہے ،پشاور الیکٹر ک سپلائی کمپنی اور ناردرن
پاور جنریشن کمپنی کے آڈٹ کی بھی منظوری دی گئی ہے ۔ ان کمپنیوں کا فرانزک آڈٹ 30 جون تک مکمل کرنے کی ڈیڈ لائن مقرر کردی گئی۔ ذرائع کا کہنا ہے دوسرے مرحلے میں پاکستان پوسٹ آفس، کوئٹہ، حیدرآباد، لاہور اور سکھر الیکٹرک پاور کمپنی کا فرانزک آڈٹ ہوگا۔ ذرائع کا کہنا ہے وزیراعظم کو بریفنگ دی گئی ہے 85 سرکاری کمپنیوں میں سے 33 کمپنیاں اربوں روپے خسارے کا شکار ہیں۔ 33کمپنیوں میں سے سے 3 کمپنیاں 85 فیصد نقصان کے ذمہ دار ہیں۔
