لاہور (این این آئی)پاکستان مسلم لیگ (ن )کے رہنما میاں جاوید لطیف نے کہا ہے کہ مسلم لیگ (ن )عید کے بعد خود عوامی اجتماعات اور ریلیاں منعقد کر رہی ہے۔رہنما نون لیگ میاں جاوید لطیف نے اپنے ایک بیان میں کہا ہے کہ سیاسی جماعتوں کے اختلافات ہوتے رہتے ہیں۔انہوں نے کہا کہ تمام پولیٹیکل فورسز عید کے بعد ایک پلیٹ فارم پر اکٹھی ہوں گی، مسلم لیگ نون لانگ مارچ کی تیاری کرے گی۔م

یاں جاوید لطیف کا کہنا تھا کہ اگر 9 جماعتوں میں کوئی جماعت آئے گی تو اسے ساتھ لیکر چلیں گے۔دوسری جانب پاکستان پیپلز پارٹی کے سینئر رہنما خورشید شاہ نے کہا ہے کہ اسمبلیوں سے استعفے دینے کا مطلب وزیر اعظم عمران خان کو مضبوط کرنا ہو گا۔پیرکومقامی احتساب عدالت میں پیشی کے موقع پرمیڈیا سے گفتگو کرتے ہوئے خورشیدشاہ نے کہا کہ ہر پارٹی کا اپنا موقف ہوتا ہے اور کسی ایک نقطے پر ساتھ چلنا بڑا مشکل ہوتا ہے تاہم امید ہے پاکستان ڈیمو کریٹک موومنٹ قائم رہے گی۔انہوں نے کہا کہ ہمیں ایک دوسرے کو برداشت کرنا پڑے گا جبکہ مولانا فضل الرحمان اور دیگر کی یہ سوچ ہے استعفیٰ دینے سے عمران خان چلا جائے گا لیکن استعفیٰ عمران خان کو مضبوط کرنے کے برابر ہو گا۔انہوں نے کہاکہ استعفیٰ دینے سے نئی پارٹیاں بنتی ہیں اور انہیں موقع مل جاتا ہے۔ آج جو نئی پارٹیاں میدان میں ہیں وہ بھی بائیکاٹ اوراستعفوں کا نتیجے ہیں۔خورشیدشاہ نے کہاکہ اسٹیٹ بینک کا آرڈیننس پاکستان کے لیے زہریلا ہے اور آرڈینیس کے بعد ہم عالمی مالیاتی ادارے (آئی ایم ایف)کے غلام ہوں گے۔ انہوں نے کہاکہ سندھ میں امن و امان کی صورتحال خراب نہیں بلکہ ملک بھرسے بہتر ہے۔