لاہور (این این آئی، آن لائن) پنجاب یونیورسٹی انتظامیہ نے تعلیمی سرگرمیوں سے متعلق اہم فیصلے جاری کر دیئے۔تفصیلات کے مطابق پنجاب یونیورسٹی انتظامیہ نے ایسوسی ایٹ ڈگری کے امتحانات ملتوی ہونے اور کورونا کے پھیلائوکے مدنظر تعلیمی سرگرمیوں سے متعلق

اہم فیصلے کر دیئے ہیں۔ یونیورسٹی سمیت الحاق شدہ کالجز کو بذریعہ نوٹیفکیشن ہدایات جاری کی گئی ہیں کہ بی ایس آنرز فرسٹ سمسٹر کے طلبا کے کورسز 15 اپریل تک مکمل کئے جائیں۔ پہلے سمسٹر کے امتحانات کے بعد دوسرے سمسٹر کی کلاسز شروع ہوں گی۔نوٹیفکیشن کے مطابق آن کیمپس ماسٹرز فرسٹ سمسٹر کے کورسز 30 اپریل تک مکمل کئے جائیں گے۔ کورسز مکمل ہوتے ہی فوری امتحانات لئے جائیں گے۔ یونیورسٹی انتظامیہ نے چوتھے اور چھٹے سمسٹر کے کورسز 30 مئی تک مکمل کرنے کی ہدایت بھی جاری کی ہیں جبکہ بی ایس اور ماسٹرز کے طلبا کو تھیسز/ریسرچ ورک جولائی تک جمع کرانے کی رعایت دے دی گئی۔دوسری جانبصوبائی دارالحکومت لاہور میں کرونا وائرس کی تیسری لہر کی مثبت شرح 16 فیصد سے تجاوز کر گئی ہے۔ جس کے باعث کرونا کی تیسری لہر سے اب بچے بھی متاثر ہونا شروع ہوگئے ہیں۔ بتایا گیا ہے کہ گزشتہ 3 روز کے دوران بچوں میں کرونا وائرس کی موجودگی کے 51 کیسز سامنے آگئے ہیں جبکہ گزشتہ 24 گھنٹوں کے دوران لاہور میں کرونا وائرس مزید 20 زندگیاں نگل گیا ہے۔ اسی طرح اس عرصے میں 1 ہزار 233 کرونا کے مثبت کیسز بھی سامنے آگئے ہیں جبکہ طبی ماہرین نے کرونا کی تیسری لہر کے جان لیوا حملوں کی وجہ لاہور کے شہریوں کی جانب سے کرونا ایس او پیز پر عدم عملدرآمد قرار دیا ہے۔