لاہور(مانیٹرنگ ڈیسک)مسلم لیگ ن کی نائب صدر مریم نواز نے نیب نوٹسز کیخلاف لاہور ہائی کورٹ عبوری ضمانت کی درخواست دائرکر دی ، درخواست پر آج ہی سماعت ہو گی۔ تفصیلات کے مطابق مسلم لیگ ن کی نائب صدر مریم نواز نیب کی جانب سے گرفتاری کے خدشے کے پیش نظر حفاظتی ضمانت کیلئے لاہور ہائی کورٹ پہنچیں ، کیپٹن(ر)صفدر،راناثنااللہ، پرویز رشید ،

مریم اورنگزیب بھی ان کے ہمراہ موجود تھیں۔نجی ٹی وی اے آر وائی کے مطابق مریم نواز نے لاہور ہائی کورٹ میں ضمانت قبل از گرفتاری کی درخواست دائر کرتے ہوئے عدالت سے کیس کی آج ہی سماعت کی استدعا کی۔ درخواست میں مؤقف اختیار کیا گیا کہ نیب نے 2انکوائریز میں 26 مارچ کو طلب کیا ہے ، حکومت کے دباؤ پرنیب درخواست گزار کو گرفتار کرنا چاہتا ہے۔ مریم نواز کا کہنا تھا کہ نیب درخواست گزارکو 26 مارچ کو گرفتار کر سکتا ہے،نیب نے 1500کنال اراضی سےمتعلق انکوائری شروع کر رکھی ہے، انکوائری میں شامل تفتیش ہونا چاہتی ہوں مگر گرفتاری کا خدشہ ہے ، استدعا ہے لاہور ہائیکورٹ عبوری ضمانت منظور کرے۔ بعد ازاں چیف جسٹس ہائیکورٹ نے ہدایت کی کیس سماعت کیلئے آج ہی مقررکیاجائے، لاہور ہائی کورٹ میں مریم نواز کی عبوری ضمانت کی درخواست پر آج ہی سماعت ہو گی۔ خیال رہے نیب نے مریم نواز کو 26 مارچ کو 1500 کنال کی مبینہ غیر قانونی منتقلی کیس اور چوہدری شوگر ملز کیس میں طلب کر رکھا ہے۔