کوئٹہ(این این آئی) پاک افغان سرحدی شہر چمن میں بم دھماکے میں تین افراد شہید ،13زخمی ہوگئے ۔لیویز حکام کے مطابق منگل کو چمن کے علاقے تاج روڈ پر لیویز ہیڈکوارٹرز کے باہر پولیس تھانہ ایس ایچ او کی گاڑی کے قریب سڑک کنارے کھڑی موٹر سائیکل میں نصب دھماکہ خیز مواد زو ر دار دھماکے سے پھٹ گیا جس کے نتیجے میں حاجی عبدالعلی ،دلاورسمیت 3افراد جاں بحق جبکہ

دو سیکورٹی اہلکاروں سمیت 13افرادسمیع اللہ ، دلاور ولدنورعلی ،دلبر،محمد داود،شاہ نواز ،ذبیع اللہ ،منصور،یاقود ،حیات اللہ ،رحمت اللہ ، عتیق اللہ ،لیویز اہلکار خان محمداور پولیس اہلکار سید محمد  زخمی ہوگئے۔دھماکے کی اطلاع ملتے ہی لیویزاورایف سی کی بھاری نفری موقع پر پہنچ گئی نعشوں اورزخمیوں کو فوری طورپر مقامی ہسپتال منتقل کردیا گیا جہاں زخمیوںکو ابتدائی طبی امداد کے بعد کوئٹہ ریفر کردیا گیا ۔دھماکے کے بعد لیویز اور ایف سی نے علاقے کو گھیرے میں لے لیاکرائم سین کیلئے بی ڈی ٹیم کوئٹہ سے چمن روانہ ہوگئی ہے مزید کارروائی سی ٹی ڈی چمن کر رہی ہے۔سول ہسپتال کوئٹہ کے ایم ایس ڈاکٹر ارباب کامران کاسی نے چمن بم دھماکے کے بعد سول ہسپتال کوئٹہ میں ایمرجنسی نافذ کردی۔ تفصیلات کے مطابق منگل کو چمن میں ہونے والے بم دھماکے کے بعدسول ہسپتال کوئٹہ کے ایم ایس ڈاکٹر ارباب کامران کاسی نے سول ہسپتال کوئٹہ میں ایمرجنسی نافذ کرتے ہوئے ڈاکٹرز،پیرامیدیکل اسٹاف اور نرسز کو فوری طورپر ڈیوٹی پر طلب کرلیا جنہوں نے ایم ایس کی موجودگی میں چمن بم دھماکے کے زخمیوں کو طبی امداد فراہم کی۔