کراچی(این این آئی)کراچی کے علاقے ناظم آباد میں فیس نہ دینے پر ساتویں جماعت کی طالبہ سے اسکول انتظامیہ کی مبینہ بدسلوکی کا مقدمہ درج کرلیا گیا،مقدمہ حبس بے جا اور دھمکیاں دینے کی دفعات کے تحت درج کیا گیاہے۔تفصیلات کے مطابق کراچی کے علاقے ناظم آباد نمبر ایک میں نجی اسکول میں ایک واقعہ پیش آیا، جہاں اسکول انتظامیہ نے فیس نہ دینے پرساتویں جماعت کی

طالبہ سے مبینہ بدسلوکی کی۔طالبہ نے بتایا کہ بریک بند کرکے لنچ کرنے سے بھی روک دیا گیا اور چھٹی ہونے سے ایک پیریڈ پہلے الگ کلاس میں اکیلا بٹھانے کے بعد میرا بیگ بھی چھین لیا گیا۔متاثرہ طالبہ اپنے والد کے ہمراہ رضویہ تھانے پہنچی اور اسکول انتظامیہ کے خلاف تھانے میں درخواست جمع کرائی۔رضویہ تھانے میں طالبہ کے والد کی مدعیت میں مقدمہ درج کیاگیا۔مقدمہ حبس بے جا اور دھمکیاں دینے کی دفعات کے تحت درج کیا گیا ، ایف آئی آر میں موقف اختیار کیا گیا چندماہ کی بیٹی کی اسکول فیس باقی تھی، اسکول انتظامیہ سے ہرماہ فیس کے ساتھ بقایا فیس لینے کی درخواست کی۔مقدمے میں کہا گیا 18 مارچ کو بچی کواسکول ٹائم میں کلاس سے باہر کھڑا رکھا گیا، چھٹی سے ایک گھنٹہ پہلے بچی کوالگ کمرے میں بند کردیاگیا، میری بیٹی کا اسکول بیگ ضبط کرلیا گیا۔والد کی جانب سے درخواست میں کہا گیاہے کہ اسکول گئے تو نہ صرف دھمکیاں دی بلکہ دونوں کو دھکے دے کر نکال دیاگیا، اسکول کے خلاف قانونی کارروائی کی جائے۔اسٹوڈنٹس پیرنٹس ایسوسی ایشن نے ایس ایس پی سے نوٹس لینے کی اپیل کی ۔