کراچی(این این آئی)ایم کیوایم لندن گروپ کی ٹارگٹ کلنگ ٹیم چلانیوالی کہکشاں حیدر کی ایک اور آڈیومنظرعام پر آگئی ہے، جس میں وہ ٹارگٹ کلر کو ہدایت دے رہی ہے کہ فجر میں کام نہیں کرنا، دوپہر یا مغرب کے وقت کام کریں۔تفصیلات کے مطابق ایم کیوایم لندن کی ٹارگٹ کلنگ ٹیم چلانے والی کہکشاں کی ایک اور آڈیو سامنے آگئی، جس میں کہکشاں حیدر ٹارگٹ کلر کو ٹارگٹ کو نشانہ بنانے کی ہدایت کررہی ہے۔آڈیو میں کہکشاں نے سرینا مارکیٹ کے قریب جامعہ مسجد کے پیش امام کو نشانہ بنانیکی بات کرتے ہوئے کہا کہ پیش امام

وہی قریب میں رہتے ہیں واک کرکے مسجد آتے ہیں اور واک کرکے جاتے ہیں۔ایم کیو ایم لندن کی رکن نے ٹارگٹ کلر کو ہدایت دی کہ فجر میں کام نہیں کرنا، فجر میں سناٹا ہوتاہے، فجر میں سناٹے کی وجہ سے دور سے ہی پتہ چلتا ہے کہ گاڑی آرہی ہے یا بائیک آرہی ہے۔کہکشاں حیدر نے ہدایت دیتے ہوئے کہا کہ دوپہر یا مغرب کے وقت کام کریں جب ٹریفک چل رہا ہو،ایسے وقت میں انسان ٹریفک میں گھس کر نکل جاتا ہے۔یاد رہے چند دن پہلے سی ٹی ڈی حکام نے کہکشاں حیدر کی ایک آڈیو پریس کانفرنس میں صحافیوں کو سنائی تھی۔