اسلام آباد (مانیٹرنگ ڈیسک/ این این آئی )نجی ٹی وی پروگرام میں گفتگو کرتے ہوئے جے یو آئی کے رہنما مولانا عبدالغفور حیدری نے کہا ہے کہ آصف علی زرداری کی کل والی تقریر کا مجھے بہت افسوس ہوا لیکن جس طرح حکومت نے چئیرمین سینیٹ کا الیکشن جیتنے کے لئے ہر حربہ استعمال کیا اسی طرح ہم بھی پی ڈی ایم کو بچانے کے لئے ہر حربہ استعمال کریں گے۔ جمعیت علماء

اسلام پاکستان کے رہنما سینیٹر عبدالغفور حیدری نے سینیٹ انتخابات میں ہارس ٹریڈنگ کا اعتراف کرلیا۔میڈیا سے گفتگو میں اپوزیشن اتحاد کے مشترکہ امیدوار برائے ڈپٹی چیئرمین نے انکشاف کیا کہ چیئرمین و ڈپٹی چیئرمین سینٹ کے انتخابات میں بدترین ہارس ٹریڈنگ ہوئی۔اْن کا کہنا تھا کہ سینیٹ انتخابات میں ضمیر فروش سینیٹرز کو منظر عام پر لانا چاہیے۔عبدالغفور حیدری کا کہنا تھا کہ پی ڈی ایم میں شامل بعض پارٹیوں کی قیادت پر دباؤ ہے، جوجماعتیں صورت حال کا مقابلہ نہیں کرسکتیں تو انہوں نے مولانا کا ساتھ کیوں دیا؟۔ عبدالغفور حیدری کا کہنا تھا کہ جے یو آئی نے اکیلے درجنوں ملین مارچ کیے اور ہم مستقبل میں بھی کرسکتے ہیں مگر جمہوریت کی بحالی کے لیے سب کا ایک ساتھ چلنا ضروری ہے۔ جے یو آئی کے سینیٹر کا کہنا تھا کہ میری ذاتی رائے ہے کہ پی پی پی مستقبل میں پی ڈی ایم کا حصہ نہیں ہو گی، زرداری کا نواز شریف کو ملک واپس بلانے کا مطالبہ دراصل بہانہ ہے جو سمجھ سے بالاتر ہے۔اْن کا کہنا تھا کہ اگر مسلم لیگ ن کی قیادت ملک میں موجود نہ ہوتی تو زرداری کا نوازشریف کی وطن واپسی کا مطالبہ درست تھا، آج ملک میں کوئی طبقہ ایسا نہیں جو حکومت کے خلاف سراپا احتجاج نہ ہو۔