اسلام آباد (آن لائن)پیپلز پارٹی پارلیمنٹریز کے صدر آصف علی زرداری نے مسلم لیگ (ن) کے قائد نواز شریف کی وطن واپسی کا مطالبہ کر دیا ۔منگل کے روز مولانا فضل الرحمن کی زیر صدارت ہونے والے پی ڈی ایم کے سربراہی اجلاس میں آصف علی زرداری نے مسلم لیگ (ن) کے

قائد نواز شریف کومخاطب کرتے ہوئے کہا کہ اگر لڑنا ہے تو ہم سب کو جیل جانا پڑے گا،میاں صاحب پلیز پاکستان تشریف لائیں، ہم نے سینیٹ انتخابات لڑے اور سینیٹر اسحاق ڈار ووٹ ڈالنے نہیں آئے،میں نے اپنی زندگی کے 14 برس جیل میں گزارے ہیں،جب 1986 اور 2007 میں شہید بی بی وطن آئیں تو ہم نے پورے ملک کو موبلائز کیا تھا،ہمیں لانگ مارچ کی ایسی ہی منصوبہ بندی کرنا ہوگی کہ جیسے 1986 اور 2007 میں شہید بی بی کی آمد پر کی تھی،مجھے اسٹبلشمنٹ کا کوئی ڈر نہیں تاہم اسٹبلشمنٹ کے خلاف جدوجہد ذاتی عناد کے بجائے جمہوری اداروں کے استحکام کی جدوجہد کیلئے ہونا چاہیے، یہ پہلی بار نہیں ہے کہ جمہوری قوتوں نے دھاندلی کا سامنا کیا ہے، میاں صاحب، آپ کیسے عوامی مسائل حل کریں گے؟ آپ نے اپنے دور میں تنخواہوں میں اضافہ نہیں کیا، میں نے اپنے دور میں تنخواہوں میں اضافہ کیا۔