اسلام آباد(آن لائن)اسلام آباد ہائیکورٹ کے جسٹس محسن اخترکیانی اور جسٹس فیاض احمد انجم جندران پر مشتمل ڈویڑن بنچ نے سابق صدر پاکستان آصف علی زرداری کے قریبی ساتھی امجد اخلاق کی ضمانت قبل از گرفتاری کی درخواست پر 1لاکھ روپے مالیت مچلکوں کے عوض عبوری ضمانت منظور کرلی۔گذشتہ روز سماعت کے دوران درخواست گزار وکیل فاروق ایچ نائیک نے کہاکہ

میرے موکل کو چھ لاکھ کا چیک وصول کرنے پر نیب نے طلب کیا ہے ،چیک بھی 2014 میں وصول کیاگیا ، نہ کیس میں ملزم نامزد ہیں نہ کوئی جرم کیا ،جس کیس میں بلایا گیا ہے وہ میگا منی لانڈرنگ کیس یے اس میں ریفرنس دائر اور فرد جرم بھی عائد ہو چکی ہے، دلائل سننے کے بعد جسٹس محسن اخترکیانی نے کہاکہ پانچ لاکھ کے عوض عبوری ضمانت منظور کی جاتی ہے، اس موقع پر فاروق ایچ نائیک ایڈووکیٹ نے کہاکہ چھ لاکھ کا چیک ہے پانچ لاکھ ضمانت کیسے دے دیں کچھ تو کم کریں، جس پر عدالت نے کہاکہ چلیں ایک لاکھ کی ضمانتی مچلکے کر دیتے ہیں ،عدالت نے امجد اخلاق ایک لاکھ مچلکوں کے عوض 29 مارچ تک  عبوری ضمانت منظور کرتے ہوئے نیب کو امجد اخلاق کی گرفتاری سے روک دیااور جواب کیلئے نیب کو نوٹس جاری کردیا۔واضع رہے کہ امجد اخلاق زرداری ہاؤس اسلام آباد کے انتظامی امور دیکھتے ہیں۔