مریدکے(این این آئی)مریدکے سٹی پولیس نے لاہور ائیر پورٹ پر چھاپہ ما ر کر پندرہ سال تک نام اور بھیس بدل کر سائوتھ افریقہ میں روپوش رہنے والے سر کی قیمت والے دہشتگرد کو ساتھی سمیت گرفتار کر لیا ۔ڈی پی او شیخوپورہ غلام مبشر میکن کو خفیہ ذرائع سے اطلاع ملی کہ
سنگین مقدمات میں مطلوب دہشت گرد مدثر جو کہ پندرہ سال تک سائوتھ افریقہ میں روپوش رہا اور اب بھیس اور نام بدل کر واپس پاکستان آرہا ہے اور لاہور ائیر پورٹ پر اترے گا ۔ڈی پی او نے ڈی ایس پی مریدکے چوہدری افتخار وریا اور ایس ایچ او تھانہ سٹی مریدکے چوہدری لیاقت جٹ پر مشتمل دو رکنی ٹیم لاہور ائیر پورٹ روانہ کی جنہوں نے ملزم کو جہاز سے اترتے ہی ساتھی سمیت گرفتار کرلیا ،پولیس کے مطابق ملزم مدثر گوجرانوالہ کا رہائشی ہے اور دہشتگردی سمیت کئی سنگین مقدمات میں عرصہ پندرہ سال سے پولیس کو مطلوب تھا اور نام بدل کر سائوتھ افریقہ میں روپوش تھا ،ملزم کے سر کی دس لاکھ روپے قیمت بھی مقرر ہے،ملزم اپنے تبدیل شدہ نام سے سفر کرکے ایک شادی میں شرکت کیلئے پاکستان پہچا اور پکڑا گیا جس سے مزید تفتیش شروع کردی گئی ہے اورسنسنی خیز انکشافات کی توقع ہے۔
