اسلام آباد(این این آئی)وفاقی وزیر اطلاعات و نشریات سینیٹر شبلی فراز نے کہاہے کہ بلاول بھٹو زرداری اور مریم نواز دونوں مل کر جمہوریت سے بہترین انتقام لے رہے ہیں۔اپنی ٹوئٹ میں وزیر اطلاعات سینیٹر شبلی فراز نے کہا کہ بلاول بھٹو زرداری اور مریم نواز دونوں مل کر جمہوریت سے بہترین انتقام لے رہے ہیں۔ انہوںنے کہاکہ پیسے سے لوگوں کے ضمیر خریدنے کی کوشش کرتے ہیں

اور پھر جمہوریت کے پیچھے چھپ جاتے ہیں۔وزیراطلاعات نے کہاکہ پاریٹوں پر قابض ہونے والے اتنے اہل اور لائق ہوتے تو کارکن کے طور پر پارٹی میں آتے۔انہوں نے کہا ہے کہ مہنگائی پر ہمارا کنٹرول نہیں، وزیراعظم نے مہنگائی کے خلاف جہاد کا اعلان کر دیا ہے،عمران خان کا عزم ہے کہ پاکستان کو نقصان پہنچانے والوں کا پیچھا کرنا ہے، شفاف انتخابات کیلئے ہم اقدامات کریں گے، معیشت کے استحکام کے بعد اس کے ثمرات اب غریب عوام کو ملیں گے،لگتا نہیں بلاول آکسفورڈ تعلیم یافتہ ہیں،انکی زبان رانا ثناء اللہ والی تھی۔ وفاقی وزیر نے کہا کہ موروثی سیاست کرنے والے اپنے بچوں کو قوم پر مسلط کرنے کے در پے ہیں ،عوام ان کے نئے دھوکے میں نہیں آئیں گے،یہ چاہتے ہیں کہ لوٹ مار کا یہ کاروبار اسی طرح جاری رہے،قوم نے فیصلہ کرنا ہے کہ کرپشن کی اس فرنچائز کا خاتمہ کرنا ہے یا انہیں لوٹنے کا لائسنس دئیے رکھنا ہے۔شبلی فراز نے کہا کہ نواز شریف اگر ووٹ کی عزت پر یقین رکھتے تو پاکستان میں ہوتے۔ انہوںنے کہاکہ مولانا فضل الرحمان اپنے برخودار نور چشمی کو اپنی گدی کے لئے تیار کر رہے ہیں، وزیر اعظم عمران خان قوم کو لوٹنے اور موروثی سیاست کرنے والوں کے راستے کی سب سے بڑی دیوار بن گئے ہیں۔