اسلام آباد (مانیٹرنگ ڈیسک / آن لائن) وزیراعظم عمران خان کی جانب سے اراکین اسمبلی کے اعزاز میں دیے گئے، نجی ٹی وی کے مطابق ظہرانے کے شرکا کو جب مچھلی، مٹن قورمہ، مرغی اور دال ماش کے علاوہ کھیر بھی پیش کی گئی تو کئی اراکین اسمبلی ایک دوسرے سے سرگوشی میں کہنے لگے کہ وزیراعظم ہاؤس میں اس سے اچھا کھانا کم ہی میسر آیا ہے۔ وزیراعظم عمران خان نے کہا ہے کہ
ا یک طرف ہم ہیں، دوسری طرف مافیا کھڑا ہے ہم اس مافیا کا مقابلہ کریں گے اور انشااللہ آج کے سینیٹ انتخابات میں ہمارے امیدوار حفیظ شیخ ہی کامیاب ہوں گے،ارکان اسمبلی کے ساتھ اب متواتر رابطہ رکھوں گا،اتحادیوں کے تحفظات سے آگاہ ہوں، بہت جلد ان کے مسائل حل کریں گے ۔ منگل کے روز وزیراعظم ہائوس میں وزیراعظم عمران خان کی جانب سے ارکان اسمبلی کے اعزازمیں ظہرانہ دیا گیا جس میں ایم کیو ایم پاکستان ،مسلم لیگ ق سمیت اتحادی جماعتوں کے ارکان اسمبلی اور پی ٹی آئی کے ممبر قومی اسمبلی سمیت وزیراعلیٰ پنجاب اور گورنر پنجاب نے شرکت کی۔وزیراعظم عمران خان نے ظہرانے میں خطاب کرتے ہوئے کہاکہ انشااللہ فتح ہماری ہوگی حفیظ شیخ ہی کامیاب ہوں گے اس بار سینیٹ میں ہماری تعداد زیادہ ہوگی ۔ انہو ںنے کہا کہ سینیٹ انتخابات جیت کر عوامی مفاد کی قانون سازی کریں گے، ایک طرف ہم ہیں دوسری طرف مافیا کھڑا ہے ہم اس مافیا کا مقابلہ کریں گے غریب کے حالات بہتر کرنے کی کوشش کررہے ہیںہم نظام میں تبدیلی لارہے ہیںسینیٹ الیکشن جیت کر قوانین میں تبدیلی لائیں گے اور عوام دوست قانون بنائیں گے ۔ وزیراعظم نے کہاکہ ارکان اسمبلی کے ساتھ اب ریگولر رابطہ رکھوں گا تمام اتحادی ہمیں ووٹ دیں گے میں اتحادیوں کے تحفظات سے آگاہ ہوں بہت جلد ان کے مسائل حل کریں گے۔ وزیراعظم عمران خان نے تمام ارکان اسمبلی کو ہدایت کی ہیں کہ وہ آج بروقت اسمبلی میں پہنچیں ۔انہوں نے ہدایت کی کہ ارکان ووٹ ڈالتے ہوئے احتیاط برتیں ہمارے ووٹ ضائع نہیں ہونے چاہئیں ۔ظہرانے میں تمام ارکان کی حکومتی امیدواروں کو ووٹ دینے کی یقین دہانی،حکومتی اتحادی ارکان نے بھی حفیظ شیخ اور فوزیہ ارشد کی حمایت کا اعلان کیا۔ ظہرانے میں پی ٹی آئی امیدوار حفیظ شیخ نے اظہار خیال کرتے ہوئے کہاکہ یہ تحریک انصاف اور عمران خان کا الیکشن ہے عمران خان اس ملک کو مستحکم کرنا چاہتے ہیں عمران خان کی ٹیم کا حصہ ہوں فتح ہماری ہوگی۔
