اسلام آباد(این این آئی) وزیراعظم عمران خان نے سینیٹ انتخابات 2021ء میں کامیابی کے لیے حکمتِ عملی ترتیب دیدی ہے۔ذرائع کے مطابق سابق وزیراعظم سید یوسف رضا گیلانی کے مقابلے میں وزیر خزانہ حفیظ شیخ کی کامیابی کو یقینی بنانے کے لیے وزیراعظم عمران خان نے ارکان قومی اسمبلی سے ملاقاتوں
کا فیصلہ کیا ہے۔ذرائع کے مطابق عمران خان 3 مارچ کے سینیٹ انتخابات سے پہلے ارکان اسمبلی سے ملاقات کریں گے۔ذرائع کے مطابق وزیراعظم اگلے 2 روز پارلیمنٹ ہاؤس میں ارکان سے ملاقاتیں کریں گے اور ایم این ایز سے اْن کے مسائل سنیں گے اور ان خدشات دور کریں گے۔ذرائع کے مطابق سینیٹ انتخابات کے باعث ہفتہ وار کابینہ اجلاس بھی مؤخر ہونے کا امکان ہے، جو تاحال نہیں بلایا گیا ہے۔ دوسری جانب تحریک انصاف کی دعوت کے باوجود متحدہ قومی موومنٹ (ایم کیو ایم) پاکستان کا کوئی رکن پاکستان تحریک انصاف کے ظہرانے میں نہیں پہنچا۔پی ٹی آئی چیف آرگنائزر سیف اللّٰہ نیازی کو دیے گئے ظہرانے میں صدر جی ڈی اے صدرالدین راشدی، وفاقی وزرا اور پی ٹی آئی ارکان نے شرکت کی۔ایم کیو ایم پاکستان نے پیپلز پارٹی کی پیشکش پر سوچ بچار شروع کردیا اور اس حوالے سے رابطہ کمیٹی کا اہم اجلاس بْلالیا۔ ترجمان ایم کیو ایم کے مطابق ارکان صوبائی اسمبلی تنظیمی مصروفیت کے باعث پی ٹی آئی ظہرانے میں شریک نہیں ہوسکے۔ایم کیو ایم کے مطابق پی ٹی آئی، جی ڈی اے قیادت مستقل رابطے میں ہیں۔
