لاہور (آن لائن) الیکشن کمیشن پنجاب نے تین مارچ 2021ء کو ہونے والے سینٹ انتخابات کے حوالے سے پنجاب کی 11 نشستوں پر 22 امیدواروں کے کاغذات نامزدگی منظور کرلئے ہیں۔ متعلقہ ریٹرنگ آفیسر کی جانب سے منظور کئے گئے کاغذات نامزدگی دائر کرنے والے
امیدواروں کی نظر ثانی شدہ فہرست بھی آویزاں کردی گئی ہے۔ بتایا گیا ہے کہ آج بروز جمعرات امیدواروں کی جانب سے کاغذات نامزدگی واپس لینے کا آخری دن ہے۔ جس کے بعد الیکشن کمیشن امیدواروں کی فائنل لسٹ آویزاں کردے گا۔ واضح رہے کہ صوبے بھر میں جنرل نشستوں پر 17 امیدواروں کے کاغذات نامزدگی منظور کئے گئے ہیں۔ خواتین کی دو نشستوں پر 3 خواتین امیدوار کی کاغذات نامزدگی منظور کئے جانے کے ساتھ ساتھ ٹیکنوکریٹ کی دو نشستوں پر دو امیدواروں کے کاغذات نامزدگی منظور کئے گئے ہیں جبکہ الیکشن کمیشن آج امیدواروں کی حتمی فہرست جاری کردے گا۔
