کراچی (این این آئی) الیکشن کمیشن سندھ نے سینیٹ امیدواروں کی نظر ثانی شدہ فہرست جاری کردی، اب مجموعی طور پر تینوں کیٹگریز پر 33 امیدوار میدان میں ہیں جن میں جنرل سیٹ پر 16، ٹیکنو کریٹ پر 8 اور خواتین کی نشست پر 9 امیدوار شامل ہیں، پیپلز پارٹی کے جنرل سیٹ پر 7، ٹیکنو کریٹ پر 3 اور خواتین پر 4 امیدوار میدان میں ہیں، تحریک انصاف کے جنرل سیٹ اور ٹیکنو
کریٹ پر 4،4 اور خواتین پر 3 امیدوار ہیں جبکہ عامر خان اور عبدالقادر خانزادہ کے کاغذات نامزدگی واپس لینے کے بعد ایم کیو ایم کے جنرل سیٹ پر 3 اور خواتین پر 2 امیدوار فہرست میں موجود ہیں۔ الیکشن ٹریبونل میں ریٹرنگ افسر کے فیصلوں کے خلاف اپیلوں کا مرحلہ مکمل ہوگیا، الیکشن ٹریبونل نے ٹیکنو کریٹ پر تحریک انصاف کے امیدوار سیف اللہ ابڑو کے کاغذات مسترد اور تحریک لبیک کے یشا اللہ خان کا نامزدگی فارم منظور کیا تھا۔ الیکشن کمیشن سندھ کی سینیٹ امیدواروں کی نظر ثانی شدہ فہرست کے مطابق عمومی نشست پر پیپلز پارٹی کے امیدواروں میں صادق علی میمن، سلیم مانڈوی والا، شیری رحمان، دوست علی جیسر، جام مہتاب حسین، تاج حیدر اور شہادت اعوان، خواتین کی نشست پر پلوشہ زئی خان، رخسانہ پروین، خیرالنسا اور فرزانہ بلوچ جبکہ ٹیکنو کریٹ کے لیے فاروق ایچ نائیک، شہادت اعوان اور کریم احمد خواجہ کے نام موجود ہیں۔ تحریک انصاف کے جنرل سیٹ پر فیصل واڈا، اشرف قریشی، محمود مولوی اور علی جونیجو، ٹیکنو کریٹ پر حسن بخشی، حنید لاکھانی اور ثمر علی خان جبکہ خواتین کی نشست پر فضا ذیشان، سرینہ عدنان اور ارم بٹ موجود ہیں، پی ٹی آئی کے ٹیکنو کریٹ کے امیدوار سیف اللہ ابڑو کے کے کاغذات نامزدگی الیکشن ٹریبونل نے مسترد کردیے تھے۔ ایم کیو ایم پاکستان کے عمومی نشست کے امیدواروں میں فیصل سبزواری، ظفر کمالی، ٹیکنو کریٹ پر ڈاکٹر شہاب امام جبکہ خواتین کی مخصوص نشست پر خالدہ اطیب اور سبین غوری شامل ہیں، جنرل سیٹ پر ایم کیو ایم کے عامر خان اور ٹیکنو کریٹ کی نشست کے امیدوار عبدالقادر خانزادہ نے کاغذات نامزدگی واپس لے لیے ہیں۔ گرینڈ ڈیموکریٹک الائنس (جی ڈی اے) کے پیر صدرالدین شاہ اور سردار رحیم بھی جنرل سیٹ کے امیدواروں میں موجود ہیں۔ الیکشن ٹریبونل کے فیصلے کے بعد تحریک لبیک کے یشا اللہ خان کا نام ٹیکنو کریٹ کے امیدواروں میں فہرست میں شامل کرلیا گیا ہے۔ الیکشن کمیشن نے سینیٹ امیدواروں کے کاغذات نامزدگی واپس لینے کی تاریخ 25 فروری مقرر کی ہے۔
